Escobar sot pritet të takojë liderët e partive politike
Emisari i Shteteve të Bashkuara të Amerikës për Ballkanin Perëndimor, Gabriel Escobar pas takimit me presidenten Vjosa Osmani dhe me kryeministrin Albin Kurti, sot në ditën e dytë të qëndrimit në Kosovë, takon liderët e partive politike.
Mëngjesin e sotëm, Memli Krasniqi kryetar i PDK-së, Lumir Abdixhiku i LDK-së dhe Ramush Haradinaj i AAK-së, do të priten në takim në Ambasadën Amerikanë të Prishtinë nga Escobar.
Pas daljes nga takimet me liderët e shtetit, Escobar mbrëmë në një deklaratë të shkurtër për media, ka thënë se kjo ishte një vizitë rutinë në Kosovë.
Escobar në takimet e djeshme është shoqëruar edhe nga ambasadori i SHBA-ve në Prishtinë, Jeff Hovenier.
Në këtë vizitë ishte planifikuar të jetë edhe këshilltari i lartë i Departamentit amerikan të Shtetit, Derek Chollet. Megjithatë, ky i fundit, anuloi vizitën në Kosovë e rajon, pasi njoftohet se doli pozitiv me sëmundjen COVID-19.
