Delegacioni i Gjilanit në vizitë zyrtare në SHBA, intensifikohen raportet me Sioux City
Një delegacion nga Gjilan po qëndron për vizitë zyrtare në Shtetet e Bashkuara të Amerikës, në kuadër të bashkëpunimit dhe binjakëzimit me Sioux City.
Pjesë e këtij delegacioni është edhe Nëntor Shaqiri, përfaqësues nga kabineti i kryetarit të Komunës së Gjilanit, Alban Hyseni, i cili ka bërë të ditur se gjatë vizitës janë zhvilluar takime me institucione dhe departamente të ndryshme të Sioux City.
“Në kuadër të vizitës zyrtare në Shtetet e Bashkuara të Amerikës, në qytetin e binjakëzimit të Komunës së Gjilanit – Sioux City, në shtetin e Iowa-s, pata nderin që, në cilësinë e përfaqësuesit të kabinetit të Kryetarit të Komunës së Gjilanit, z. Alban Hyseni, së bashku me një delegacion të përbërë nga përfaqësues të disa drejtorive komunale, përfaqësues të shoqërisë civile dhe Komandanti i Stacionit të Policisë së Kosovës në Gjilan, të zhvillojmë takime me përfaqësues të departamenteve dhe institucioneve të ndryshme të Sioux City”, ka thënë Shaqiri.
Sipas tij, delegacioni gjatë qëndrimit në Iowa ka vizituar institucione relevante dhe ka zhvilluar takime produktive me përfaqësues lokalë.
“Gjatë qëndrimit tonë në Sioux City, delegacioni ynë ka vizituar institucione dhe departamente të ndryshme relevante, ku kemi zhvilluar takime shumë produktive dhe kemi shkëmbyer përvoja dhe praktika të mira në fusha të ndryshme të bashkëpunimit institucional”, u shpreh ai.
Shaqiri ka theksuar se kjo vizitë dhe bashkëpunim pritet të ndikojnë në forcimin e marrëdhënieve ndërmjet dy qyteteve.
“Ky bashkëpunim forcon më tej miqësinë dhe partneritetin ndërmjet Komunës së Gjilanit dhe Sioux City, duke krijuar mundësi të reja për shkëmbim përvojash, zhvillim institucional dhe bashkëpunim afatgjatë në fusha të ndryshme me interes të përbashkët”, ka deklaruar ai.
