QEN TË BRAKTISUR, KLYSHA NË RRUGË DHE HESHTJE INSTITUCIONALE – Alarmohet situata në Prishtinë
Prishtinë – Aktivistët për mbrojtjen e kafshëve po ngritin alarmin për rritjen e numrit të qenve endacakë dhe klyshave të braktisura në kryeqytet, ndërsa institucionet, sipas tyre, po tregojnë neglizhencë totale ndaj situatës.
Aktivistja për të drejtat e kafshëve, Yllka Asipi, thotë se pothuajse çdo ditë pranon thirrje nga qytetarë, dashamirë të kafshëve dhe aktivistë për raste të ndryshme të qenve të braktisur, të shkelur apo të keqtrajtuar.
“Nuk ka orë e çast që qytetarët, aktivistët apo dashamirët e kafshëve nuk më thërrasin për raste të ndryshme të qenve, e kohëve të fundit edhe për klysha të sapolindur, të shkelur, të braktisur apo të copëtuar. Krejt këtë barrë dhe këtë dhimbje po e mbajmë disa njerëz që kemi dhembshuri për ta, ndërkohë që institucionet përgjegjëse po flenë”, deklaron Asipi.
Ajo thekson se gjithë angazhimin e saj e bën në baza vullnetare dhe pa asnjë mbështetje financiare institucionale.
“Nuk kam fonde publike, nuk kam donatorë e as organizatë. Gjithçka që bëj është nga xhepi im dhe në baza vullnetare”, shton ajo.
Sipas Asipit, situata është alarmante pasi në çdo lagje e periferi të Prishtinës po shtohen klyshat, ndërsa mungon një strategji konkrete për kastrim dhe sterilizim nga institucionet kompetente.
“Në çdo cep të rrugës, në çdo lagje e periferi ka klysha. Shumimet po lulëzojnë, ndërsa kastrim dhe sterilizim nga institucionet përgjegjëse pothuajse nuk ka. Barra po mbetet tek aktivistët dhe donatorët që ndihmojnë herë pas here”, thekson ajo.
Në fund, aktivistja e përshkruan gjendjen si “tmerruese”, duke bërë thirrje për reagim urgjent nga institucionet përgjegjëse.
