Bordi në njëvjetorin e konstituimit: RTK ka hyrë në rrugë të drejtë
Në njëvjetorin e konstitutimit, Bordi i Radio Televizionit të Kosovës (RTK) ka konstatuar se transmetuesi publik, me gjithë sfidat e panumërta, ka hyrë në rrugë të drejtë të mirëfunksionimit si institucion publik.
“Njëherësh, gjatë kësaj kohe, RTK-ja është konsoliduar në një transmetues të raportimit të drejtë, të paanshëm e objektiv, përkatësisht në një transmetues në shërbim të publikut. Gjatë kësaj periudhe njëvjeçare Bordi i RTK-së ka marrë vendime të shumta të cilat kanë përmirësuar funksionimin e punës në RTK”, thuhet në komunikatën e Bordit të RTK-së.
“Me këtë rast, Bordi i RTK-së dëshiron të sigurojë qytetarët e Republikës së Kosovës se angazhimi për ta shndërruar RTK-në në pikë referuese për informim do të vazhdojë”.
Bordi nëpërmjet kësaj komunikate kërkon edhe njëherë nga Kuvendi i Republikës së Kosovës si themelues i transmetuesit publik që t’i marrë parasysh kërkesat e RTK-së për ta bërë ndarjen e posaçme buxhetore në mënyrë që misioni i ideuar në dhjetor të vitit të kaluar, kur është votuar përbërja aktuale e bordit, të përfundojë me sukses.
