Presheva pesë ditë në festë: vazhdon tradita e festivalit teatror “Ditët e Komedisë Shqipe 2022”
Nga 19 deri më 23 dhjetor mbahet festivali teatror “Ditët e komedisë Shqipe 2022” në Preshevë – edicioni – edicioni i 17-të.
Fillet e festivalit “Ditët e Komedisë shqipe”
Sipas shënimeve mësohet se Festivali i Komedisë Shqiptare në Preshevë filloi në vitin e 1995. Artistë, profesorë, letrarë e profesionistë të artit dramatik dhe teatrit nga vende të ndryshme të trungut etnik u bënë bashkë në Preshevë për t’i vënë themelet e një institucioni të rëndësishëm për zhvillimin e artit teatror, siç ishte atëbotë dhe vazhdon edhe sot – Festivali Kombëtar i Komedisë në Preshevë.
Dr. Latif Berisha, Haqif Mulliqi, Emin Kabashi, Agron Boriçi, Fadil Hysaj, Xhemaludin Salihu e Havçe Hasani, ishin nismëtarët, të cilët përpos projektit hartuan edhe Statutin e Festivalit të cilin më 16 shkurt 1995 e mitaton Këshilli Ekzekutiv i Komunës së Preshevës.
Në mars të po ati viti u zgjodh Këshilli Profesional i Festivalit në përbërje: Fadil Hysaj, Emin Kabashi, Haqif Mulliqi, Zimo Krutaj, Sokol Angjeli, Sefedin Nuredini dhe veprimtari i shquar teatror Agron Boriçi.
Drejtor i parë i Festivalit u zgjodh Xhemaludin Salihu; përzgjedhës – Sefedin Nuredini, udhëheqës i tryezës – Emin Kabashi, ndërsa Informatorin do ta redaktonte – Haqif Mulliqi.
Anëtarë të Jurisë Profesionale të edicionit të parë u zgjodhën: Fadil Hysaj, Zimo Krutaj e Xhevat Limani.
Kështu nisi dhe vazhdoi me sukses, duke mbledhur artistë e njerëz të kulturës ndër vite e dekada, për të arritur deri në edicionin e 17- të, i cili fillon sot, më 19 dhjetor 2022, dhe për pesë netë me radhë do të sjellë para artdashësve preshevar pesë shfaqje të teatrove nga Ferizaj, Prishtina, Gjilani, Presheva dhe Gostivari.
Përkundër vështirësive, drejtori Kujtim Sadriu me stafin e Shtëpisë së Kulturës, Teatrin e Qytetit dhe me mbështetjen e të parit të Komunës së Preshevës z. Shqiprim Arifit, kanë arritur që të bëjnë përgatitjet e nevojshme organizative dhe teknike që Festivali të ecë për së mbari, thuhet në njoftimin për medi
Preshevarët do të mirëpresin aktorë, regjisorë, shkrimtarë, dramaturgë, skenografë dhe punëtorë teatror me prezencën e tyre në sallën e Shtëpisë së Kulturës “Abdullah Krashnica”, përfundon njoftimi paralajmërues për këtë festival unik, i cili për nga përmbajtja është i vecantë, pasi ngërthen në strukturën e tij kryesisht shfaqje teatrale – komedi.
Padyshim se Teatri i Preshevës sa e sa herë ka dëshmuar se është i përkushtuar në avancimin e kësaj skene aq të rëndësihme për vazhdimësinë e traditës, ndërsa numri gjithnjë e në rritje të profesionistëve të arsimuar në arte skenike nga Presheva e Lugina në përgjithësi, është një lajm tejet pozitiv dhe shpresëdhënës për të ardhmen e jetës teatrale në këtë komunë.
