Zjarre të mëdha në Corroticë, lokalitet në Komunën e Preshevës
Një zjarr i madh ka përfshirë zonën pyjore mbi fshatin Corroticë të Preshevës.
Kështu ka njoftuar kryetarja e Komunës së Preshevës, Ardita Sinani, më 06.07.2025, e cila potencoi se flakët po përhapen me shpejtësi.
“Shtabi për Situata të Jashtëzakonshme është aktivizuar menjëherë dhe është në koordinim të plotë me ekipet e zjarrfikësve që ndodhen në terren. Janë kontaktuar edhe shtabet përkatëse në Vrajë dhe komunat përreth për ndihmë të menjëhershme”- tha Sinani.
Tutje, e para e Preshevës u bën thirrje të gjithë banorëve që të tregojnë kujdes maksimal dhe të ndjekin udhëzimet e autoriteteve. Po ashtu u kërkon që mos të ndezin zjarre në pyje apo afër shtëpive, sepse siç thotë ajo, edhe pakujdesia më e vogël mund të sjellë pasoja të mëdha për njerëzit dhe natyrën.
“Kujdes i shtuar kërkohet edhe në pjesët tjera të qytetit dhe komunës sonë, pasi thatësia dhe temperaturat ekstreme e rrisin ndjeshëm rrezikun për zjarr”- shkroi kryetarja në Facebook.
Si përfundim, ajo shprehet falënderuese ndaj të gjithë atyre që janë në vijën e parë të përballjes me zjarrin dhe janë duke bërë maksimumin për ta vënë nën kontroll situatën.
