Besar Musolli i jep fund karrierës, Gjilani përshëndet një nga kapitenët më të respektuar kuqebardh
Një nga futbollistët më të respektuar të viteve të fundit në futbollin kosovar, Besar Musolli, i ka dhënë fund karrierës si futbollist aktiv.
Lajmin e ka bërë të ditur Sport Club Gjilani, i cili ka përshëndetur ish-kapitenin kuqebardh, duke e cilësuar atë si një prej figurave më të rëndësishme që ka veshur fanellën e klubit.
Musolli mbyll një karrierë të gjatë e dinjitoze, ndërsa te Gjilani kaloi më shumë se tri sezone, duke mbajtur edhe shiritin e kapitenit në dy edicione dhe duke lënë gjurmë si në fushë, ashtu edhe në dhomat e zhveshjes.
Me fanellën kuqebardh, mesfushori regjistroi 89 paraqitje në kampionat, tetë ndeshje në Kupën e Kosovës dhe katër paraqitje në garat evropiane të UEFA Conference League.
I njohur për vizionin në lojë, lidershipin dhe profesionalizmin, Musolli fitoi respektin e bashkëlojtarëve, tifozëve dhe opinionit sportiv, duke u shndërruar në një nga kapitenët më të vlerësuar në historinë e klubit.
Në mesazhin e lamtumirës, Sport Club Gjilani e falënderoi Musollin për kontributin e dhënë ndër vite, për përkushtimin dhe emocionet që u dhuroi tifozëve, duke i uruar suksese në kapitullin e ri të jetës së tij.
