Gjilan: Drejtori Kushtrim Ibrahimi sqaron rastin në Kuvendin e Gjilanit: “Nuk ka pasur konflikt fizik”
Ibrahimi: U afruam vetëm për të ndihmuar në rikthimin e rendit gjatë seancës.
GJILAN, 26 QERSHOR 2026 – Drejtori i Shërbimeve Publike, Infrastrukturës dhe Banimit në Komunën e Gjilanit, Kishttim Ibrahimi, ka reaguar me një sqarim publik lidhur me ngjarjen e ndodhur gjatë seancës së sotme të Kuvendit Komunal.
Në reagimin e tij, Ibrahimi distancohet nga lajmet që po qarkullojnë për një kinse konflikt mes tij dhe asamblistëve të PDK-së.
“Kërkoj mirëkuptim nga qytetarët e Komunës së Gjilanit, kolegët drejtorë dhe asamblistët, pasi ngjarja e sotme nuk ishte e hijshme, por gjithsesi nuk është ashtu siç po paraqitet dhe po reklamohet nga disa media e rrjete sociale”, thuhet në sqarim.
Sipas tij, gjatë seancës së rregullt, një grup asamblistësh të PDK-së tentuan të pengonin zhvillimin normal të seancës, duke insistuar në ndërprerjen e saj dhe duke ushtruar presion pranë foltores së Kryesueses së Kuvendit.
“Në atë situatë, unë dhe kolegët e mi u afruam vetëm për të ndihmuar në rikthimin e rendit dhe vazhdimin normal të seancës”, sqaron Ibrahimi.
Ai mohon kategorikisht pretendimet në rrjetet sociale për konflikt fizik apo përplasje personale. “Këto pretendime nuk pasqyrojnë të vërtetën”, thotë ai.
Ibrahimi shton se pas përfundimit të seancës ka biseduar me asamblistin në fjalë dhe kanë shprehur mirëkuptim të ndërsjellë për situatën e krijuar. “Në fund të videos është përshëndetja pas përfundimit të seancës”, përfundon reagimi i tij.
