Gjilan: Kuvendi i Gjilanit miraton Kornizën Afatmesme Buxhetore 2027-2029
Seanca e tensionuar përfundon me miratimin e KAB-it dhe shtyrjen e pikave të tjera për shkak të pengesave nga opozita.
GJILAN, 26 QERSHOR 2026 – Kuvendi i Komunës së Gjilanit, nën udhëheqjen e Kryesueses Krenare Latifi-Kqiku, ka miratuar të premten Kornizën Afatmesme Buxhetore (KAB) 2027-2029.
Në seancë u votuan edhe: korrigjimi i një gabimi teknik për bartjen e mjeteve financiare nga viti paraprak, propozim-vendimi për dhënien në menaxhim të objekteve të ndërtuara në të ashtuquajturin “Fshati Lumtur” në lagjen Zabel i Sahitagës, si dhe propozim-vendimi për formimin e Komisionit për zgjedhjen e drejtorëve dhe zëvendësdrejtorëve të IEAP-ve.
Tensione gjatë seancës
Seanca u zhvillua në një atmosferë të tensionuar. Grupi i këshilltarëve të PDK-së, në formë proteste, pengoi mbarëvajtjen e punimeve të Kuvendit. Arsyetimi i tyre ishte seanca nuk mund të vazhdojë pa u përfshirë në rend dite raporti vjetor i punës së kryetarit për vitin 2025.
Kryesuesja Latifi-Kqiku tha se në momentin kur raporti i punës së kryetarit për vitin 2025 të vijë në rend dite, kryetari Alban Hyseni do të raportojë para kuvendarëve. Ajo shtoi se pikat e mbetura të rendit të ditës shtyhen për seancën e radhës, pasi nuk kishte kushte për mbarëvajtjen e seancës.
“Respektojeni këtë Kuvend sepse po na shohin qytetarët. Për shkak të situatës në të cilën jemi, kërkoj që pikat e mbetura të shtyhen për seancën e radhës. Bëhet fjalë për formimin e komisioneve për të drejtat e njeriut, për këshillat e fshatrave dhe për emërtimin e rrugëve”, theksoi Latifi-Kqiku.
Pikat e shtyra për seancën e ardhshme
Për seancën e ardhshme janë shtyrë këto propozime: kërkesa nga Njësia për të Drejtat e Njeriut për themelimin e Komitetit për Barazi Gjinore; formimi i Komisionit për zgjedhjen e këshillave lokale; emërimi i Komisionit për dhënien e titujve të nderit, çmimeve, mirënjohjeve dhe shpërblimeve; emërimi i Komisionit për plotësimin e emërtimit të rrugëve dhe numrit të adresave, si dhe shqyrtimi i kërkesave dhe ankesave në këtë proces; emërimi i Këshillit Komunal për vlerësimin e meritave historike e shoqërore të personaliteteve dhe ngjarjeve nga territori i Komunës së Gjilanit, tërësia etnike shqiptare dhe më gjerë; si dhe emërimi i Komisionit të përhershëm për përcaktimin e listës së lokacioneve dhe hapësirave publike, vendosjen e përmendoreve, shtatoreve, busteve dhe simboleve brenda territorit të Gjilanit.
