Hakerët vjedhin të dhënat: Zbulohet numri i rusëve të vrarë në luftën në Ukrainë

Sipas të dhënave të rrjedhura nga Agjencia Shtetërore e Statistikave të Rusisë (Rosstat), në luftën në Ukrainë janë vrarë më shumë se 450 mijë rusë. Kështu, lufta që nga viti 2022 është bërë shkaku i katërt më i shpeshtë i vdekjeve në Rusi, shkruan The Moscow Times.

Rusia nuk i ka publikuar zyrtarisht humbjet e saj në fushëbetejë që nga shtatori i vitit 2022, ndërsa vlerësimet e pavarura i ka hedhur poshtë vazhdimisht si të pabesueshme. Sipas shifrave të Rosstat-it, lufta në Ukrainë është konflikti më vdekjeprurës për Rusinë që nga Lufta e Dytë Botërore, duke tejkaluar shumë edhe numrin prej 13 mijë ushtarësh sovjetikë të vrarë gjatë luftës nëntëvjeçare në Afganistan.

“Lufta nuk ka qenë kurrë më vdekjeprurëse”

Rosstat ishte cak i një sulmi kibernetik nga 29 tetori deri më 1 nëntor. Sulmi u krye nga grupet e hakerëve “Partizanët Kibernetikë të Bjellorusisë” dhe “Silent Crow”, të cilat lanë edhe mesazhet e tyre në faqen kryesore të agjencisë. Këto grupe, të cilat në Rusi janë të ndaluara si “organizata ekstremiste”, vodhën të dhëna për ekonominë ruse, demografinë dhe humbjet në luftë.

“Ky është deri më tani rrjedhja më domethënëse e të dhënave për viktimat ruse”, deklaroi për The Moscow Times Janis Kluge, drejtues i sektorit për Rusinë dhe Euroazinë në Institutin Gjerman për Çështje Ndërkombëtare dhe të Sigurisë.

“Besoj se tashmë është konfirmuar se lufta nuk ka qenë kurrë më vdekjeprurëse sesa është aktualisht”, shtoi ai.

Çfarë zbulojnë të dhënat?

Përveç ushtarëve aktivë, shifra e përllogaritur nga grupi “Silent Crow” përfshin edhe civilët e vrarë në sulmet ajrore, si dhe gjatë inkursionit ukrainas në rajonin rus të Kurskut në vitin 2024.

Numri i përgjithshëm i të vrarëve ka të ngjarë të jetë edhe më i madh, pasi të dhënat nuk përfshijnë ushtarët e zhdukur, si dhe 27 mijë luftëtarë të huaj, të cilët, sipas vlerësimeve, janë rekrutuar në forcat e armatosura ruse.

The Moscow Times ka verifikuar në mënyrë të rastësishme 50 emra nga baza e të dhënave e mbajtur nga Mediazona dhe BBC në gjuhën ruse, duke i krahasuar me të dhënat e grupit “Silent Crow”, por nuk ka arritur ta konfirmojë plotësisht të gjithë bazën e të dhënave.

Megjithatë, shifrat përputhen me vlerësimet e tjera për humbjet ruse. Në fillim të shtatorit, Ministria britanike e Mbrojtjes njoftoi se më shumë se gjysmë milioni njerëz kanë humbur jetën duke luftuar për Rusinë, ndërsa numri i përgjithshëm i viktimave, përfshirë të plagosurit, mund të arrijë në 1.5 milionë.

Që nga fillimi i pushtimit të Ukrainës, për çdo kilometër katror të territorit të pushtuar janë vrarë 6.2 rusë. Kostoja njerëzore e zgjerimit territorial është rritur nga viti në vit, pasi numri i vdekjeve të regjistruara po shtohet, ndonëse përparimi rus në vijën e frontit është ngadalësuar.

Baza e të dhënave tregon se jo të gjithë të vrarët kanë humbur jetën në luftime të drejtpërdrejta. Në 14.160 raste, vdekja e pjesëtarëve të forcave të armatosura ruse është klasifikuar si pasojë e shkaqeve joluftarake, përfshirë sëmundjet, aksidentet e trafikut dhe vetëvrasjet.

Më shumë se 32 mijë persona kanë vdekur nga plagët e marra të paktën një vit më parë.

Ndërkohë, “Partizanët Kibernetikë të Bjellorusisë” kanë publikuar një shifër më të ulët, prej 393.881 të vrarësh. Ata kanë përdorur një metodologji tjetër, duke përfshirë vetëm vdekjet e personelit ushtarak ose të civilëve gjatë luftimeve, si dhe ato që kanë ardhur si pasojë afatgjatë e konfliktit.

Barra e pabarabartë e luftës

Sipas të dhënave, 72 për qind e vdekjeve janë regjistruar në të ashtuquajturën Republika Popullore e Donjeckut, ku më shumë se 20 mijë ushtarë rusë janë vrarë gjatë betejës dhjetëmujore për Bahmutin.

Të dhënat konfirmojnë hulumtimet që tregojnë se republikat etnike të Rusisë janë prekur në mënyrë joproporcionale nga mobilizimi dhe rekrutimi ushtarak. Qytetet e mëdha, si Moska, kanë një pjesëmarrje më të vogël në numrin e përgjithshëm të viktimave sesa do të pritej në raport me numrin e banorëve të tyre.

Studiuesja Maria Vjushkova deklaroi për The Moscow Times se politika e Kremlinit për rekrutimin, për disa nga grupet më të vogla etnike në Rusi, përbën “shfarosje të popujve të tërë”.

Burrat joshen t’i bashkohen ushtrisë përmes pagave shumë më të larta se ato që mund të fitojnë në rajonet e tyre, si dhe kompensimeve të majme për familjet në rast vdekjeje. Disa prej tyre rekrutohen edhe përmes ofertave për t’u liruar nga burgu.

Kluge tha për The Moscow Times se, ndonëse shifrat e Rosstat-it janë dramatike, ato, në vetvete, mund të kenë ndikim relativisht të vogël ekonomik.

“Kjo përbën rreth gjysmën e një për qind të popullsisë ruse në moshë pune, e cila numëron 80 milionë banorë. Kjo nuk mjafton që të bëhet lajm kryesor, pasi burrat që po luftojnë, në përgjithësi, as që kanë punuar në sektorë me produktivitet të lartë”, tha ai.

“Megjithatë, rëndësia kryesore është politike”, shtoi Kluge. “Bëhet fjalë për atë se kush po e fiton këtë luftë, dhe nuk mund të thuhet se Rusia po fiton”.Burimi i lajmit: /Index.hr.