Shqiptarët e Karakurtit (Ukrainë) ruajnë gjuhën dhe traditat prej më shumë se tre shekujsh
Prej më shumë se 300 vitesh, një komunitet shqiptarësh jeton në jug të Ukrainës, duke ruajtur me përkushtim gjuhën, traditat dhe identitetin shqiptar.
Në fshatin Karakurt jetojnë pasardhës të shqiptarëve që dikur u larguan nga trevat e Korçës dhe Pogradecit. Edhe pse kanë kaluar shekuj nga largimi i tyre, në këtë komunitet fëmijët vazhdojnë të mësojnë gjuhën shqipe dhe historinë e Shqipërisë.
Shumë prej tyre nuk e kanë vizituar asnjëherë vendin e të parëve, por ëndrra e tyre është që një ditë të shkelin në tokën e stërgjyshërve.
Një projekt i ri synon të realizojë pikërisht këtë dëshirë, duke sjellë 12 fëmijë shqiptarë nga Ukraina në Shqipëri për një udhëtim kulturor 12-ditor. Gjatë kësaj vizite ata pritet të njihen nga afër me historinë dhe kulturën shqiptare, duke vizituar qytete dhe qendra të rëndësishme historike si Tirana, Kruja, Berati, Apollonia dhe Vlora.
Edhe pas më shumë se tre shekujsh larg atdheut të të parëve, shqiptarët e Karakurtit vazhdojnë të shprehen me krenari: “Ne jemi shqiptarë”.
