Prof. Hajrush Fazliu nderohet me mirënjohje ndërkombëtare në Turqi për kontributin e tij në artin pamor
Piktori i njohur kosovar, Prof. Hajrush Fazliu, ka marrë edhe një vlerësim të rëndësishëm ndërkombëtar, duke u nderuar me një mirënjohje të veçantë në kuadër të edicionit të nëntë të International “Chapeao Kalpak Art Symposium”, i mbajtur nga 3 deri më 12 korrik 2026 në Şarköy – Tekirdağ të Turqisë.
Mirënjohja iu dorëzua për kontributin e tij artistik, të cilin organizatorët e vlerësuan si një “kontribut bujar me energji dhe ngjyrë në harmoninë e Natyrës, Verës dhe Artit”, duke çmuar krijimtarinë dhe prezantimin e tij në këtë aktivitet ndërkombëtar që mblodhi artistë nga vende të ndryshme të botës.
Prof. Fazliu theksoi se ky vlerësim tejkalon dimensionin personal, duke e cilësuar si një dëshmi të pranisë së vazhdueshme të artit bashkëkohor të Kosovës në skenën ndërkombëtare. Sipas tij, krijimtaria artistike ndër vite ka ndërtuar ura komunikimi mes kulturave, ndërsa piktura mbetet një gjuhë universale që bashkon njerëzit përtej kufijve.
Ai u shpreh se çdo mirënjohje e fituar jashtë vendit është një hap i ri në promovimin e artit shqiptar dhe një dëshmi se talenti, përkushtimi dhe identiteti kulturor vlerësohen edhe në arenën ndërkombëtare. Pjesëmarrja në simpoziume të tilla, sipas tij, kontribuon në forcimin e imazhit të Kosovës si vend i kulturës, krijimtarisë dhe dialogut artistik.
Në fund, Prof. Hajrush Fazliu shprehu mirënjohje të veçantë për organizatorin Bülent Kapllak dhe kuratorin Prof. Dr. Orhan Cebrailogulu, si dhe për kolegët artistë që e uruan për këtë vlerësim, i cili i shtohet një rrugëtimi të gjatë suksesesh në promovimin e artit pamor kosovar në botë.
