Drejtuesit e Shkollës së Futbollit “Kosova” – Viti njoftojnë për ftesën e tre lojtarëve në Zvicër
Drejtuesit e Shkollës së Futbollit “Kosova” nga Viti kanë njoftuar përmes faqes së tyre në rrjetet sociale se tre nxënës të shkollës janë përzgjedhur zyrtarisht për të vazhduar karrierën te klubi zviceran SR Delémont.
Bëhet fjalë për Albin Sejdiun, 19 vjeç, dhe dy lojtarët 17-vjeçarë, Olt Ademi dhe Dior Hajrullahu.
Sipas njoftimit, pas një periudhe vëzhgimi dhe provash profesionale në Zvicër, të tre futbollistët do t’i bashkohen SR Delémont nga muaji gusht dhe do të qëndrojnë gjatë gjithë sezonit të ardhshëm.
Përzgjedhja erdhi pas testeve të zhvilluara nga data 19 deri më 22 maj në qytetet Solothurn, Neuchâtel dhe Biel/Bienne, në kuadër të Qendrës Stërvitore JURA.
Në shkurt, tre përfaqësues nga Zvicra – një i autorizuar nga Federata Zvicerane e Futbollit dhe dy menaxherë – kishin qëndruar në Kosovë për të përcjellë nga afër dy ndeshje kampionale të shkollës.
SR Delemont garon në Promotion League, liga e tretë më e fortë në Zvicër, ku marrin pjesë edhe ekipet U-21 të klubeve të mëdha si Zürich, Basel, Young Boys dhe Lugano.
Shkolla e Futbollit “Kosova” – Vitia ka falënderuar bashkatdhetarët Feti Sadiku dhe Skender Fuga për ndërmjetësimin dhe përkujdesjen ndaj lojtarëve gjatë qëndrimit në Zvicër, si dhe prindërit për besimin e dhënë.
Sipas drejtuesve, ky sukses është rezultat i punës shtatëvjeçare të shkollës dhe një motiv për të vazhduar bashkëpunimin me zyrtarë të Federatës Zvicerane dhe menaxherë, me qëllim hapjen e rrugës edhe për talente të tjera drejt futbollit profesionist evropian.
