Ligjëratë ndërkomunitare në Kamenicë për të drejtat e njeriut dhe mbrojtjen nga diskriminimi
Në kuadër të zbatimit të Planit Lokal të Veprimit për Strategjinë për Avancimin e të Drejtave të Komuniteteve Rom dhe Ashkali 2022–2026, në Komunën e Kamenicës është mbajtur një aktivitet ndërkomunitar me fokus në të drejtat e njeriut dhe mbrojtjen nga diskriminimi.
Aktiviteti u organizua nga Koordinatorja e Njësisë Komunale për të Drejtat e Njeriut, Nazmije Demolli Kastrati, në bashkëpunim me përfaqësuesen e komunitetit rom, Bahtije Kryeziu, dhe me mbështetjen e misionit të OSBE-së.
Gjatë ligjëratës, pjesëmarrësit u informuan mbi të drejtat themelore të njeriut, format e diskriminimit dhe rëndësinë e raportimit të rasteve të shkeljes së të drejtave. Po ashtu, u prezantuan institucionet përgjegjëse ku qytetarët mund të drejtohen për mbështetje dhe raportim.
Në aktivitet morën pjesë rreth 50 fëmijë nga komuniteti rom në Kamenicë dhe fshatin Berivojcë. Përmes diskutimeve dhe materialeve edukative, u synua rritja e vetëdijes për barazinë, bashkëjetesën dhe respektimin e të drejtave të çdo komuniteti.
Në fund të aktivitetit, ekipi i OSBE-së shpërndau materiale edukative dhe rekreative për fëmijët pjesëmarrës.
