Gjilani “zien” para derbit: “Intelektualët” nxisin festën, Drita sot mund ta vulosë titullin ndaj Ballkanit
Atmosfera në Gjilan ka marrë flakë vetëm pak orë para derbit më të madh të sezonit. “Intelektualët” kanë nisur grumbullimin dhe festën që katër orë para ndeshjes, me shpresën se sot Drita do ta vulosë edhe matematikisht titullin kampion – pikërisht ndaj rivalit të përbetuar, Ballkanit.
Albi Mall Superliga e Kosovës vazhdon me javën e 33-të, ndërsa e gjithë vëmendja është përqendruar te përballja që nis nga ora 16:00 në stadiumin me bari sintetik në Gjilan.
Skuadra gjilanase hyn në këtë duel me tetë pikë epërsi ndaj Ballkanit dhe me vetëm tri javë që mbesin pas kësaj xhiroje. Një fitore sot do të ishte vendimtare për Dritën, duke i dhënë fund garës për titull dhe duke ndezur festën e madhe bardhekaltër në qytet.
Në anën tjetër, Ballkani zbret në fushë me misionin për të prishur atmosferën festive dhe për të mbajtur gjallë shpresat për mbrojtjen e titullit. Therandasit kanë edhe motiv shtesë, pasi në përballjen e fundit ndaj Dritës kishin triumfuar bindshëm me rezultat 3-0 në Suharekë.
Paralelisht, një tjetër sfidë me shumë rëndësi zhvillohet mes Drenicës dhe Gjilanit. “Shqiponjat e Zeza” kërkojnë pikë jetike në betejën për mbijetesë, ndërsa Gjilani synon t’i japë fund krizës së rezultateve pas pesë ndeshjeve pa fitore.
