Mbi 21 mijë kërkesa për regjistrim të votuesve nga diaspora, KQZ jep detaje për procesin
Komisioni Qendror i Zgjedhjeve (KQZ) ka bërë të ditur se deri të premten në ora 09:00 janë pranuar gjithsej 21,378 kërkesa për regjistrim të votuesve jashtë Kosovës për zgjedhjet e ardhshme.
Sipas të dhënave të siguruara nga Ekonomia Online dhe të konfirmuara nga zëdhënësi i KQZ-së, Valmir Elezi, deri më tani janë aprovuar 9,149 aplikime, 1,037 janë refuzuar, ndërsa 11,187 kërkesa mbeten ende në shqyrtim.
Elezi ka bërë të ditur se periudha e aplikimit për regjistrimin e votuesve jashtë Kosovës ka nisur më 6 maj dhe do të përfundojë më 17 maj 2026.
“Përmes platformës elektronike janë pranuar 21,378 kërkesa për regjistrim. Prej tyre, 9,149 janë aprovuar, 1,037 janë refuzuar dhe 11,187 janë në pritje të shqyrtimit”, ka deklaruar Elezi.
Sipas tij, nga aplikimet e aprovuara:
- 2,284 shtetas janë regjistruar për votim fizik në përfaqësi diplomatike;
- 239 janë regjistruar për të dërguar fletëvotimin në kutinë postare të KQZ-së në Kosovë;
- 6,626 janë regjistruar për votim përmes postës jashtë Kosovës.
KQZ ka bërë të ditur se për zgjedhjet e këtij viti planifikohet organizimi i votimit në 48 përfaqësi diplomatike me gjithsej 70 vendvotime, përfshirë 33 ambasada dhe 15 konsullata.
Numri maksimal i votuesve që mund të regjistrohen për votim fizik në përfaqësi diplomatike është 66,450, ndërsa për votimin përmes postës nuk ka kufizime.
Po ashtu, KQZ ka vendosur që në një përfaqësi diplomatike votimi fizik të organizohet vetëm nëse regjistrohen të paktën 50 votues. Në rast se ky numër nuk arrihet, votuesit do të kalojnë automatikisht në votim përmes postës dhe do të njoftohen nga KQZ.
Ndërkohë, për votuesit që zgjedhin votimin me postë, KQZ do të vazhdojë praktikën e zgjedhjeve të fundit, duke ua dërguar pakot me fletëvotime në adresat e tyre jashtë Kosovës.
