Studentët e Fakultetit të Shkencave Kompjuterike të UKZ-së morën pjesë në Konferencën e 5-të studentore të CIT në Tiranë
Studentët e Fakultetit të Shkencave Kompjuterike të Universitetit Publik “Kadri Zeka” në Gjilan, së bashku me stafin akademik, kanë marrë pjesë në Konferencën e 5-të studentore të organizuar nga Canadian Institute of Technology (CIT) në Tiranë, ku bashkëorganizator ishte edhe UKZ-ja.
Konferenca, e mbajtur me temën “From Smart Skills to Smart Growth in the Digital Era”, mblodhi studentë, profesorë, studiues dhe profesionistë nga universitete të ndryshme të rajonit dhe më gjerë, duke krijuar një platformë të rëndësishme për prezantimin e ideve inovative dhe diskutimin e zhvillimeve më të fundit në teknologji dhe transformim digjital.
Në kuadër të kësaj konference, gjashtë grupe studentësh nga Fakulteti i Shkencave Kompjuterike prezantuan gjashtë punime shkencore, të fokusuara kryesisht në zhvillimin e ueb-aplikacioneve moderne dhe sistemeve digjitale të bazuara në sensorë dhe mikrokontrollorë Arduino Uno.
Punimet u realizuan nën mentorimin e profesorëve Prof. Dr. Ragmi Mustafa, Prof. Dr. Basri Ahmedi, Prof. Dr. Ekrem Alimi dhe Prof. Ass. Dr. Afërdita Ibrahimi, të cilët kanë mbështetur vazhdimisht studentët në zhvillimin e projekteve kërkimore dhe inovative.
Pjesëmarrja në këtë aktivitet shkencor u vlerësua si një mundësi e rëndësishme për studentët e UKZ-së për të prezantuar punën e tyre akademike, për të shkëmbyer përvoja me pjesëmarrës nga universitete të ndryshme dhe për të krijuar kontakte profesionale në fushën e teknologjisë dhe inovacionit.
Në konferencë morën pjesë universitete dhe institucione akademike nga Tirana, Shkodra, Elbasani, Korça, Tetova dhe Shkupi, si dhe pjesëmarrës ndërkombëtarë nga vende të ndryshme evropiane dhe Shtetet e Bashkuara të Amerikës në formë online.
Nga Universiteti “Kadri Zeka” u tha se studentët u dalluan me prezantimet e tyre cilësore dhe qasjen inovative në fushën e inxhinierisë dhe teknologjisë, duke promovuar potencialin akademik dhe profesional të universitetit në një arenë ndërkombëtare.
Pjesëmarrja në këtë konferencë konsiderohet një sukses i rëndësishëm për Fakultetin e Shkencave Kompjuterike dhe për Universitetin Publik “Kadri Zeka”, në funksion të promovimit të kërkimit shkencor, inovacionit dhe bashkëpunimit ndërkombëtar në arsimin e lartë.
