Nxënësit e Shkollës së Muzikës në Gjilan shkëlqejnë në koncertin karaoke, zbulojnë talentin dhe potencialin artistik
Një aktivitet i veçantë artistik është organizuar nga nxënësit e Shkollës së Muzikës në Gjilan, të cilët kanë mbajtur një koncert karaoke me qëllim të prezantimit të talentit, vokalit dhe potencialit të tyre muzikor para publikut.
Aktiviteti është realizuar nën përkujdesjen e profesorit Hekuran Bllaca, i cili përmes një publikimi në rrjetet sociale bëri të ditur se koncerti kishte karakter prezantues dhe edukativ, duke u ofruar nxënësve një përvojë të rëndësishme interpretative dhe skenike.
Sipas tij, maturantët performuan me entuziazëm dhe energji të veçantë, duke interpretuar këngë nga zhanre të ndryshme muzikore dhe duke krijuar një atmosferë të mbushur me emocione, art dhe duartrokitje.
“Sa po e mbajtëm edicionin e radhës me shkollën e muzikës, ku nxënësit, maturantët performuan me shumë kënaqësi dhe e shijuan pafund atmosferën artistike. Ata ishin të lirë të interpretonin këngë në zhanre të ndryshme muzikore, duke sjellë emocione, energji dhe duartrokitje të shumta. Një ditë e mbushur me muzikë, buzëqeshje dhe pasion për artin”, ka shkruar profesori Bllaca.
Ky aktivitet vlerësohet si një mundësi e rëndësishme për zhvillimin artistik të të rinjve dhe promovimin e talenteve të reja muzikore në Gjilan, duke dëshmuar edhe një herë potencialin që posedojnë nxënësit e kësaj shkolle në fushën e muzikës dhe interpretimit skenik.
