Eurodeputeti Lukas Mandl sjell përvojën evropiane në UKZ duke ligjëruar para studentëve të FSHS-së
Eurodeputeti Lukas Mandl, po vazhdon ciklin e ligjëratave me studentët e programit Marrëdhëniet Ndërkombëtare dhe Studimet Evropiane në Fakultetin e Shkencave Sociale të Universiteti Publik “Kadri Zeka”, duke sjellë një qasje të integruar ndërmjet reflektimit teorik dhe përvojës institucionale në fushën e sigurisë ndërkombëtare.
Në kuadër të lëndës “Siguria ndërkombëtare: Teoritë dhe konceptet”, ai trajton zhvillimin konceptual të sigurisë nga format klasike drejt qasjeve bashkëkohore, duke i vendosur teoritë kryesore si realizmi, liberalizmi dhe konstruktivizmi në raport me dinamikat aktuale të sistemit ndërkombëtar. Ligjëratat ndërtohen mbi një analizë kritike, ku konceptet nuk mbeten abstrakte, por marrin jetë përmes rasteve konkrete dhe zhvillimeve aktuale në politikën globale.
Në vijim, trajtimi i çështjeve si konfliktet e armatosura, arkitektura e sigurisë evropiane, roli i NATO-s dhe i Bashkimit Evropian, si dhe proceset e transformimit politik në Ballkanin Perëndimor, i mundëson studentëve të kuptojnë ndërveprimin kompleks ndërmjet teorisë dhe praktikës së vendimmarrjes ndërkombëtare. Vëmendje e veçantë i kushtohet pozitës së Kosovës, e analizuar në raport me sfidat e sigurisë, integrimit evropian dhe zhvillimeve rajonale. Përfshirja e përvojës së drejtpërdrejtë të z. Mandl si eurodeputet e pasuron procesin studimor me perspektiva autentike mbi funksionimin e institucioneve evropiane dhe mekanizmat realë të politikë bërjes.
Dekani i Fakultetit të Shkencave Sociale, Prof. Asoc. Dr. Selim Daku, thekson se angazhimi i z. Mandl në këtë fakultet përbën një vlerë të jashtëzakonshme për studentët dhe stafin akademik. Sipas Dekanit Daku, prania e Lukas Mandl në UKZ, nuk është vetëm një kontribut profesional, por edhe një dimension që i jep gjallëri dhe kuptim tjetër jetës akademike në universitet. Ai e cilësoi këtë bashkëpunim si një urë të gjallë ndërmjet teorisë dhe realitetit, ku praktikat konkrete të politike bërjes ndërkombëtare nuk mbeten në dokumente apo salla parlamentare, por zbresin në mënyrë organike në bankat e sallave të mësimit, duke u bërë pjesë e mendimit kritik dhe formimit të studentëve.
Në këtë mënyrë, përvoja diplomatike dhe institucionale e z. Mandl shndërrohet në një burim frymëzimi dhe orientimi, duke i dhënë studimeve një dimension më të hapur, më të prekshëm dhe më të lidhur me zhvillimet reale ndërkombëtare.
Angazhimi i tij përbën një kontribut të rëndësishëm në ndërkombëtarizimin e jetës akademike të Fakultetit të Shkencave Sociale, duke forcuar lidhjet me institucionet evropiane dhe duke krijuar mundësi të reja zhvillimi profesional për studentët.
