Çifti nga Gjilani diplomon njëkohësisht – sukses i përbashkët në mjekësinë orale
Një çift bashkëshortësh nga Gjilani ka arritur një sukses të rrallë në fushën e stomatologjisë, duke përfunduar njëkohësisht specializimet e tyre pas një rrugëtimi të gjatë me sfida, sakrifica dhe përkushtim të madh.
Bashkëshortja, Jona Canaj ka përfunduar specializimin në Ortodonci, ndërsa Vedat Avdyli në Kirurgji Orale dhe Implantologji, duke shënuar kështu një moment të rëndësishëm në jetën e tyre profesionale dhe personale.
Ky rrugëtim, sipas tyre, nuk ka qenë i lehtë, por është përballuar falë mbështetjes së ndërsjellë dhe përkushtimit të përbashkët për të arritur këtë qëllim. Ata kanë theksuar se çdo hap e kanë bërë bashkë, duke e kthyer këtë sukses në një arritje të përbashkët.
Mirënjohje të veçantë çifti ka shprehur për familjet e tyre në Kosovë dhe Shqipëri, për dashurinë dhe mbështetjen e pakushtëzuar ndër vite, si dhe për miqtë dhe kolegët që i kanë qëndruar pranë gjatë gjithë këtij rrugëtimi.
Një falënderim i veçantë u është kushtuar edhe profesorëve për përkushtimin në formimin profesional, si dhe pacientëve për besimin dhe bashkëpunimin.
Emocionues mbetet edhe dedikimi për fëmijët e tyre, Amblin dhe Odritin, për të cilët ata shprehen se çdo sakrificë gjatë këtij rrugëtimi ka qenë për të ardhmen e tyre.
Ky sukses shënon fillimin e një etape të re për çiftin, të cilët synojnë të vazhdojnë kontributin e tyre në shëndetësi dhe në kujdesin ndaj pacientëve, duke e kthyer përkushtimin e tyre në shërbim të komunitetit.
Postimi
Pas një rrugëtimi të gjatë, plot sfida, sakrifica dhe shumë përkushtim, më në fund unë dhe Vedati arritëm të përfundojmë një nga etapat më të rëndësishme të jetës sonë profesionale dhe personale.
Sot mbyllet një kapitull i rëndësishëm: unë si specialiste e Ortodoncisë, ndërsa Vedati si specialist i Kirurgjisë Orale dhe Implantologjisë.
Falënderoj Zotin mbi të gjitha për shëndetin dhe që na ka ruajtur gjatë gjithë këtij rrugëtimi, si dhe për forcën dhe durimin që na ka dhënë në çdo hap.
Një falënderim i veçantë për Vedatin, shokun tim të jetës, me të cilin vazhdojmë çdo hap ta bëjmë bashkë. Mbështetja, forca dhe besimi yt më kanë shtyrë përpara që nga dita e parë dhe vazhdojnë të jenë pjesë e çdo arritjeje timen.
Mirënjohje e thellë për familjen time, si në Kosovë ashtu edhe në Shqipëri, për sakrificat, dashurinë dhe mbështetjen e pakushtëzuar. Pa mbështetjen tuaj, ky rrugëtim ndoshta do të kishte qenë i pamundur.
Faleminderit miqve të mi dhe sidomos shoqërisë sime të ngushtë për mirëkuptimin, përkrahjen dhe energjinë pozitive.
Një falënderim i veçantë për kolegët e mi të specializimit, me të cilët kemi ndarë jo vetëm auditorin dhe klinikën, por edhe momente që na kanë lidhur si miq përjetë. Prania juaj e ka bërë këtë rrugëtim shumë më të lehtë dhe shumë më të bukur.
Mirënjohje për profesorët e mi të shkëlqyer, që nuk kursyen asgjë për të na dhënë dijen dhe për të na formuar profesionalisht, si dhe për pacientët, për besimin dhe bashkëpunimin. Çdo përvojë ka qenë një mësim i vlefshëm.
Këtë arritje ia kushtoj me gjithë zemër dy fëmijëve të mi, Amblit dhe Odritit. Ju kërkoj falje sepse për të përmbushur këtë ëndërr u desh të merrja nga koha juaj. Çdo sakrificë ka qenë edhe për të ardhmen tuaj.
Lus Zotin të na japë mbi të gjitha shëndet dhe që kjo etapë e përfunduar të jetë fillimi i shumë arritjeve të reja dhe rrugëve të bukura përpara.
Mirënjohëse për gjithçka kam kaluar dhe e emocionuar për rrugën që më pret përpara.
