Drita rikthehet te fitoret, mposht Dukagjinin dhe vazhdon garën për titull
FC Drita është rikthyer te fitoret në kampionat, pasi ka triumfuar me rezultat 2-1 ndaj KF Dukagjini në Gjilan.
Rastin e parë në ndeshje e patën mysafirët, por Berisha dhe Isufi nuk arritën të konkretizonin para portës.
Megjithatë, vendasit reaguan shpejt dhe në minutën e 12-të kaluan në epërsi. Mike Arthur asistoi bukur për Besnik Krasniqin, i cili u gjend mirë në zonë dhe realizoi me kokë për 1-0.
Dukagjini u kundërpërgjigj në minutën e 34-të, kur sulmuesi i talentuar Hekuran Berisha shënoi një gol të bukur për të barazuar shifrat në 1-1.
Me këtë rezultat u mbyll pjesa e parë e takimit.
Pjesa e dytë nisi më mirë për klinasit, të cilët krijuan dy raste të mira shënimi pas disa gabimeve në mbrojtjen e Dritës, por pa arritur të konkretizonin.
Inkuadrimi i Veton Tushës rezultoi vendimtar, pasi sulmuesi nga Kaçaniku realizoi për 2-1 në minutën e 63-të me kokë, pas harkimit të Blerim Krasniqit.
Deri në fund të ndeshjes nuk pati më gola dhe Drita arkëtoi tri pikë të rëndësishme në shtëpi.
Pas kësaj fitoreje, Drita vazhdon garën për titull dhe renditet në vendin e dytë me 45 pikë, aq sa ka edhe lideri Ballkani, ndërsa Dukagjini mban pozitën e gjashtë me 33 pikë.
Në ndeshjen e ardhshme, Drita luan si mysafire ndaj rivalit lokal Gjilanit, ndërsa Dukagjini pret Prishtinën e Re.
