Kurti deklarohet pas takimit dy orësh me Osmanin: Afatet po rrjedhin, do të bëjmë çmos ta konstatojmë Kuvendin
Kryeministri në detyrë, njëherit kreu i Lëvizjes Vetëvendosje është deklaruar pas takimit që zgjati rreth dy orë me Presidenten Vjosa Osmani, lidhur me ngërçin e krijuar.
Kurti tha se afatet e dhëna në Aktgjykimin e Kushtetueses po rrjedhin dhe se do të bëjnë çmos që edhe me konsensus të konstituojnë Kuvendin.
“Porsa e përfunduam takimin me znj.Osmani lidhur me konstituimin e Kuvendit, në dritën e aktgjykimit. Afatet po rrjedhin. Do të bëjmë çmos që në frymën e bashkëpunimit dhe gjithashtu me idenë e konsensuti ta realizojmë këtë gjë, që më pastaj të kalojmë te formimi i qeverisë së re”, deklaroi Kurti.
Ai tha se duhet pritur edhe takimet e Osmanit me liderët e partive tjera për të parë rezultatin.
“Tash znj.Presidente do të ketë takime edhe me përfaqësuesit e partive tjera. Në fund do të mund të shohim a kemi bërë përparim, sa kemi përparim dhe sa është i mjaftueshëm ky përparim. Unë besoj që duhet tu japim shansin edhe takimeve tjera dhe në fund të shohim se cili është progresi”, tha Kurti.
Fillimisht Osmani do të ketë një takim me të ngarkuarën me punë në Ambasadën e ShBA’së në Kosovë, teksa më pas do të vazhdojë me takimin me Kryetarin e PDK’së, Memli Krasniqin, pastaj me atë të LDK’së, Lumir Abdixhikun dhe në fund atë të AAK’së, Ramush Haradinajn. Takimet pritet të përfundojnë në orën 16:00.
Osmani do t’i vazhdojë takimet edhe nesër, me krerët e partive minoritare.
