Miratohet buxheti i Komunës së Gjilanit për vitin 2025/ Kryetari Hyseni e vlerëson si një moment të rëndësishëm
Është miratuar buxheti i Komunës së Gjilanit, në vlerë rreth 40 milionë euro, pas shtatë muajsh zvarritjeje, shkruan faqja zyrtare e Komunës së Gjilanit, përcjell TV Gjilani.
Kryetari i Komunës së Gjilanit Alban Hyseni, tha se sot, pas shumë përpjekjesh dhe diskutimesh, arritën të miratojnë buxhetin e komunës sonë për vitin 2025, me vlerë rreth 40 milionë euro.
“Ky është një moment i rëndësishëm për qytetin tonë, pasi ky buxhet do të jetë në shërbim të qytetarëve pa dallim, duke mundësuar investime dhe zhvillim për Gjilanin që duam”, tha Alban Hyseni.
I pari i komunës tregon se në buxhetin e miratuar nuk është përfshirë projekti i bulevardit të qytetit në vlerë prej 20 milionë euro.
Ky projekt, i cili do të kishte një ndikim të madh në infrastrukturën dhe zhvillimin urban të Gjilanit, është larguar nga opozita gjatë diskutimeve të sotme. Mungesa e tij do të thotë një mundësi e humbur për modernizimin e hapësirave publike, lehtësimin e qarkullimit dhe krijimin e një mjedisi më të mirë për qytetarët.
“Pavarësisht kësaj, ne mbetemi të përkushtuar për të punuar që projekte të rëndësishme si ky të gjejnë mbështetje dhe të realizohen në të ardhmen”, tha kryetari i Gjilanit, Alban Hyseni.
