Temperaturat deri në 24°C: Fillimi i javës me mot pranveror, por më pas priten rrebeshe lokale shiu të shoqëruara me baltë dhe shkarkesa rrufesh

Gjatë kësaj jave, moti do të dominohet nga masa të ngrohta ajrore, mirëpo nga mesi i javës do të ketë edhe paqëndrueshmëri atmosferike.

Nga dita e premte, këto kushte do të pasohen nga depërtimi i masave më të ftohta ajrore.

Nën ndikimin e këtyre kushteve, dita e hënë dhe e martë do të karakterizohen kryesisht me diell. Në mëngjesin e së martës, mund të krijohen kushte për vranësira të ulëta ose mjegull nëpër ultësira dhe lugina, të cilat do të tërhiqen gjatë orëve vijuese të ditës.

Të mërkurën, parashikohet mot kryesisht me diell gjatë pjesës së parë të ditës, ndërsa gjatë orëve të pasdites dhe mbrëmjes pritet shtim i vranësirave, të cilat lokalisht do të shoqërohen me rrebeshe shiu dhe shkarkesa rrufesh.

Vlen të theksohet se do të ketë prani të grimcave të pluhurit saharian, si pasojë e të cilave, në zonat ku do të ketë reshje, shiu do të jetë i përzier me baltë.

Dita e enjte do të vijojë me alternime vranësirash dhe kthjellimesh. Gjatë orëve të para të 24-orëshit dhe në mëngjes, lokalisht priten rrebeshe shiu, të shoqëruara me disa shkarkesa rrufesh. Në orët e mbrëmjes dhe gjatë natës, pritet të depërtojë fronti i ftohtë, i cili do të sjellë reshje të reja, lokalisht në formë rrebeshesh, të shoqëruara me shkarkesa rrufesh.

Pluhuri saharian do të vazhdojë të jetë i pranishëm, duke bërë që reshjet të jenë të përziera me baltë. Pluhuri pritet të largohet gjatë mbrëmjes dhe natës, me depërtimin e frontit të ftohtë.

Të premten, gjatë orëve të para të 24-orëshit dhe në mëngjes, do të kalojë fronti i ftohtë, i cili lokalisht do të sjellë rrebeshe shiu, të shoqëruara me shkarkesa rrufesh. Gjatë ditës, vranësirat pritet të tërhiqen. Temperaturat do të pësojnë rënie në vlerat maksimale.

Gjatë fundjavës, pritet një stabilizim i përkohshëm i motit, me alternime vranësirash dhe intervalesh me diell. Po ashtu, temperaturat pritet të shënojnë një rritje të lehtë. Megjithatë, të dielën ekzistojnë sërish sinjale për paqëndrueshmëri atmosferike dhe mundësi për reshje të reja lokale. Kjo do të varet nga lëvizja dhe shpejtësia e zhvendosjes së sistemit me presion të ulët, i cili, me shumë gjasë, mund të arrijë vonë të dielën ose të hënën.

Era do të fryjë nga drejtime të ndryshme, ndërsa herë pas here, lokalisht, pritet të jetë e fortë deri shumë e fortë, kryesisht nga mesi i javës dhe sidomos gjatë depërtimit të frontit të ftohtë, me shpejtësi prej 15-56 km/h.

Temperaturat minimale do të lëvizin nga 1 deri në 13°C, ndërsa ato maksimale nga 14 deri në 24°C. /MeteoKosova/