Mbërrin moshën e pensionimit gazetari Sylejman Ismajli
Gazetari Sylejman Ismajli ka mbërrirë moshën e pensionimit.
Ai u lind në vitin 1960 në Kopërnicë të komunës së Dardanës. Shkollimin fillor dhe të mesëm e kreu në Gjilan. Ka përfunduar Shkollën e Lartë Komerciale. Fillimisht kishte punuar në Kombinatin e Tekstilit “Integj” në Gjilan në cilësinë e ekonomistit.
Punën i si gazetar i sportit e ka filluar në vitin 2002 në Televizionin Lokal MEN në Gjilan, ku për pesë vite me radhë ka udhëhequr redaksinë e sportit, duke përgatitur storie dhe duke komentuar të gjitha ndeshjet që zhvilloheshin në Gjilan, por edhe jashtë Gjilanit.
Ai ishte edhe redaktor i sportit në këtë televizion. Prej vitit 2005 ishte korrespondent i sportit në të përditshmen “Koha ditore”, gazetë në të cilën punoi deri në vitin 2011, për të kaluar më pas në të përditshmen sportive “Sport Plus”.
Ka punuar edhe në Gazetën Sport, Rajonipress.com dhe gazetën elektronike Kryelajmi.com. Për punën e tij në informimin sportiv katër herë është shpallur gazetari më i mirë i sportit, mirënjohje të cilin e ndanë Drejtoria për Kulturë, Rini e Sporte në Gjilan.
Aktualisht jeton dhe vepron në Gjilan, ku vazhdon të ushtrojë profesionin e gazetarit sportiv në disa gazeta online dhe duke shkruar analiza në cilësinë e opinionistit. Ai është shpërblyer me mirënjohje edhe nga shumë klube sportive, federata të ndryshme të sportit e shoqata.
Mediat onine lokale e qendrore, nw mesin e tw cilave edhe TV Gjilani.com, i urojnw ditwlindjen e 65-tw dhe pensionimin njwkohwsisht, duke i dëshiruar jetë të gjatë dhe të lumtur gazetarit Sylejman Ismajli.
Kolegët e tij gazetarë e kanë vlerësuar në vazhdimësi profesionalizmin dhe përkushtimin e gazetarit Sylejman Ismajli, për kontributin e tij të cmuar në informim jo vetëm në sport, por edhe me artikuj të tjerë të ndryshëm.
Dedikimi i TV Gjilani për kontributin e gazetarit Sylejman Ismajli në fushën mediale ndër vite e dekada, në 65-vjetorin e lindjes së tij, është bazuar në artikullin e botuar në gazetën online: Kryelajmi.com
