“Eco Higjiena” ngritë çmimet nga 5 në 6.5 euro për shërbimet e mbeturinave, reagon kreu i degës së PDK-së Riad Rashiti

Rritet çmimi i shërbimeve të Kompanisë së Mbeturinave “EcoHigjiena” nga 5 në 6.5 Euro, reagon kryetari i degës së PDK-së, Riad Rashiti.

Faturat e fundit të Kompanisë EcoHigjiena”, ekonomitë familjare kanë vërejtur se për muajin janar kanë ardhur me një ngritje të theksuar, nga 5 në 6.5 euro. Kjo ka nxitur reagime të ndryshme, ndërsa ka reaguar edhe dega e PDK-së në Gjilan, gjegjësisht kryetari i saj Riad Rashiti.
Në reagimin e tij publik Rashiti e ka cilësuar të patolerueshme shkeljen e marrëveshjes së Partneritetit Publiko-Privat (PTT), në mes të komunës së Gjilanit dhe Partnerit Austriak.
Në reagim të kreut të degës së PDK-së, i cili njëherit është drejtor i Drejtorisë së Financave në Komunën e Gjilanit, potencohen një sërë shkeljesh nga kjo kompani, për të cilat Rashiti ka thënë se do të inicohet thirrje e një seance të jashtëzakonshme të Kuvendit të Komunës së Gjilanit, lidhur me këtë çështje…

R e a g i m i i d e g ë s s ë PDK-së

Rritja e çmimit nga Eko-Higjiena për grumbullimin e mbeturinave është i kundërligjshëm dhe i papranueshëm. Shkelja e marrëveshjes së PPP në mes komunës së Gjilanit dhe partnerit austriak është e patolerueshme. Përveç që nuk janë realizuar investimet e parashikuara në kontratën e nënshkruar prej 1.5 mil euro, është bërë njëanshëm edhe futja në pagesë për amvisërit e familjeve të dëshmorëve dhe veteranëve të UÇK-së edhe pse e kemi diskutuar këtë çështje me kompaninë Eko-Higjiena.

Edhe rritja e tarifës për grumbullimin e mbeturinave është plotësisht në kundërshtim me marrveshjen, kontratën dhe rregulloren e Kuvendit Komunal të Gjilanit, neni 38.1. Nuk mund të tolerohet shkelja e vazhdueshme e marrveshjes me Eko-Higjienën, e ligjeve dhe rregullores së KK Gjilan.

Partia Demokratike e Kosovës, ditëve në vazhdim do të inicojë thirrjen e seancës së jashtëzakonshme të Kuvendit Komunal në Gjilan, për të diskutuar dhe anuluar rritjen e çmimit të Eko-Higjienës, prej 5 euro në 6.5 euro, si dhe për implementimin e investimeve nga partneri austriak.

E kohë më parë drejtori i Kompanisë “Eco Higjiena, Senad Rama ka paralajmëruar një rritje të shërbimeve pasi siaps tij kostot e larta të shërbimeve në tërësi, si dhe pagat e punonjësve të rritura gjatë 10 viteve të fundit, kostoja e karburanteve, e një sërë çështjesh tjera, sipas tij kanë determinuar rritjen e tarifës së shërbimeve për ekonomitë familjare, me arsyetimin se ajo nuk mund të përballohet me trendin e fundit të rritjeve enorme të shpenzimeve, ka thënë Rama:

“Kostot e larta po rrezikojnë bartjen dhe deponimin e mbetjeve, më shumë se 10 vite, tarifat e mbeturinave shtëpiake në rajonin e Gjilanit janë 5 euro në muaj. Nga ajo kohë, pagat e punëtorëve janë rritur mbi 30% kurse kostot e karburantit me 50%. Së fundmi, Ministria e Ekonomisë vendosi të rrisë tarifat e deponise me më shumë se 37%”, tha ai, duke paralajmwruar rritjen e çmimit.

“Se sa i rëndësishëm është deponimi korrekt i mbetjeve, është treguar jo vetëm gjatë pandemisë. Çdo javë dhe në të gjitha kushtet atmosferike, punonjësit tan mbledhin mbeturinat dhe i transportojnë në deponi. Kjo është një sasi totale prej 40 milionë kilogramë mbetje në vit ! Për vitin e ardhshëm 2023 do të duhet të paguhen 315 mijë euro. Ndërsa, nga viti 2024, do të shtohen 40,000 € tjera shtesë dhe kështu për çdo vit tjetër përtej vitit 2027” ka shtuar Senad Ramaj.

“Punonjësit tanë meritojnë pagë të drejtë kurse ne në anën tjetër rritjen e kostos nuk mund t’a mbulojmë me tarifën e tanishme 5 € për amvisëri. Prandaj, si të gjitha kompanitë për grumbullim-bartjen e mbeturinave në Republikën e Kosovës, edhe “Eco-Higjiena”, ka aplikuar për rritjen e tarifës për 1.50 € në muaj. Edhe PAMKOS është duke një gjë të tillë. Në disa komuna si Kaçaniku, Istogu dhe Ferizaj etj., tashmë kanë aprovuar rritjen e tarifës” shton Ramaj.

Në interes të higjienës dhe shëndetit të popullatës, Senad Ramaj ka apeluar që të pranohet rritja e tarifës dhe tarifat të paguhen rregullisht si deri më tani.

“Kështu, punonjësit e “Eco – Higjienës”, do të jenë në gjendje të vazhdojnë ta kryejnë punën e tyre me përkushtim e besueshmëri” ka përfunduar Ramaj.

Kujtojmë që pakënqësitë mes dy partnerëve, Komunës së Gjilanit dhe Kompanisë “EcoHigjiena”, kanë qenë mjaft të thella ndër vite, duke u potencuar si alternativë herë-herë edhe shkëputja e marrëveshjes reciproke, porse një gjë e tillë nuk është inicuar asnjëherë.