Nenad Rashiq emërohet ministër për Kthim dhe Komunitete
Kryeministri i Kosovës, Albin Kurti, ka emëruar ministrin e ri në Ministrinë për Kthim dhe Komunitete.
Ai është Nenad Rashiq, aktualisht kryetar i Partisë Demokratike Progresive, forcë politike kjo që në zgjedhjet e fundit parlamentare, nuk është pjesë e Kuvendit të Kosovës.
Megjithatë, në zgjedhjet e fundit parlamentare, Rashiq së bashku me Rada Trajkoviqin, formuan Iniciativën Qytetare, me të cilën fituan një deputet në Kuvendin e Kosovës.
Sidoqoftë, javë më parë, deputeti Cvetko Veljkoviq nga kjo Iniciativë, deklaroi se do të veprojë si deputet i pavarur.
Emërimin në postin e ministrit, Rashiq e konfirmoi në një deklarim për RTKlive. Më vonë, këtë e konfirmoi edhe Zyra e Kryeministrit të Kosovës.
“Kryeministri Kurti e uroi z. Rashiq për detyrën dhe përgjegjësitë e reja institucionale në Republikën e Kosovës”, shkruan në njoftim.
Rashiq në këtë post, pason Goran Rakiqin nga Lista Serbe, parti kjo e cila nën dirigjimin e Beogradit zyrtar dhe direkt të presidentit Aleksandar Vuçiq, ka dhënë dorëheqje.
Një akt të tillë e kanë bërë edhe deputetët e kësaj partie si dhe pjesëtarë të policisë e drejtësisë në katër komunat në veri të Kosovës, duke kundërshtuar zbatimin e vendimit të Qeverisë së Kosovës për targat.
Në anën tjetër, Nenad Rashiq, nuk është i panjohur për postet qeveritare që ka mbajtur edhe më parë.
Para tre vjetësh, kryeministri Albin Kurti e kishte emëruar këshilltar politik në qeverinë “Kurti 1”. Gjithashtu, në qeverinë “Thaçi 1” dhe “Thaçi 2”, ishte ministër i Punës dhe Mirëqenies Sociale në vitet 2008-2014.
Bazuar në Kushtetutën e Kosovës, pakica serbe e ka të garantuar së paku një post ministror.
