Gjilan: Shoqëria Civile proteston kundër dhunës, solidarizohet me vitkimat e të gjitha llojeve, veçmas fëmijët me autizëm
Në Gjilan u protestua me qëllim që të solidarizohemi për të mbrojtur të drejtën për jetë të çdo qytetari, të dënojmë vrasjen dhe dhunën ndaj grave, në veçanti mbrojtjen e të drejtave fëmijëve autik.
Të tronditur nga rasti i mbrëmshëm protesta iu kushtua edhe dënimit të vrasjes së grave dhe mbrojtjes të së drejtës për jetë të çdo individi.
Përquar mesazhin për fëmijët autik të abuzuar, para protestuesve foli në cilësinë e nanës znj. Anita Ademi.
“Të nderuar pjesëmarrës! Të nderuar organizatorë të protestës, Rrjeti i Organizatave të Shoqërisë civile në Gjilan, ju që më dhatë mundësinë të ju drejtohem sot si nanë!
“Neve si prindër, Zoti na fali engjujt, femijët tanë me sindrome të ndryshme, që të u falim dashurinë dhe kujdesin e merituar. Andaj, gjatë këtij rrugëtimi u munduam të zgjedhim trajtime adekuate me profesionistë të fushave të ndryshme, me qëllimin e vetëm që të kenë mundësi t’i tejkalojnë veshtirësitë. Aspak nuk ishte e lehtë përzgjedhja e njerëzve të duhur që t’iu besohet qenia më e çmuar që e kishim. Kështu takuam profesionistë që e bëjnë punën e tyre me shumë përkushtim, e po ashtu edhe të atillë, edhe pse përkundër marrjes së shumave të majme të parave, në vend të shërbimeve i ofruan dhunë dhe trajtim jo njerëzor një femiu krejt të pambrojtur dhe në nevojë, sikur rasti që dëgjuam dhe e pamë kohë më parë, e që na tronditi të gjithëve, e po ashtu na mblodhi sot këtu. “, tha ajo.
Znj. Ademi më tej i ka bërë thirrje gjykatës që t’i trajtoj si duhet rastet e këtij lloji, sikurse kërkoi nga institucionet përkushtim adekuat me politika sociale, dhe shërbime sa më cilësore për kategoritë e fëmijëve me nevoja të vecanta.
“Në fund, t`iu rikujtojë që femijët tanë janë pjesë e kësaj shoqërie dhe e këtij shteti. Ju lutem jepni mundësi të jetojnë me dinjitet si gjithë të tjerët dhe mos të jenë brengë vetëm e familjes”, shtoi ajo.
Ndërsa Mediana Bislimi-drejtore e Qendrës për Rrjetëzim dhe Bashkëpunim të Organizatave, dënoi aktet e dhunës, abuzimet dhe vrasjen e fundit.
”Protesta, edhe pse ishte paraparë më herët, rasti i mbrëmshëm në Prishtinë, e ka rënduar akoma dhe na ka prekur shumë! Një grua shtatzënë u vra! Një grua me një fëmijë! Gruaja në ditët më të mira të jetës, e fëmiu akoma duke e shijuar aromën parajsore në mitrën e nënës, vriten dhe shuhen përgjimonë. Iu mohua e drejta për jetë, e drejta për të frymuar, e drejta për të patur ëndrra”, tha ajo.
Znj. Bislimi ka apeluar për vigjilencë të shtuar nga institucionet lokale e qëndrore, veçmas në përzgjedhjet e stafit shërbyes në institucionet e kujdesit mjekësor, duke apeluar që veprimet të jenë më të rrepta me kontrolle ispektoriale, në funksion të implementimit adekuat të politikave sociale, për t’iu mundësuar marrjen e shërbimeve të kontrolluara dhe sa më cilësore të gjithë fëmijëve.
“Lutemi, urojmë dhe duam t’u besojmë e të na garantojnë institucionet tona se më asnjë fëmijë tjetër të mos jetë viktimë apo të pësojë në duart e mjekëve të ashtuquajtur profesionistë. Dua t’iu rikujtoj që femijët tanë janë pjesë e kësaj shoqërie dhe e këtij shteti, prandaj ju lutemi t’u jepni mundësi të jetojnë me dinjitet si gjithë të tjerët e mos të jenë brengë vetëm e familjes. Ju lutemi, ju përgjërohemi mos na zhgënjeni më!“, potencoi ajo.
Protesta e sotme është mbështetur nga CCNO-Qendra për Bashkëpunim Rrjetëzim të Organizatve me një pjesë të Organizatat anëtare: ShNV, RARE, GruajaHyjnore, Lansdown, Agrofarm, SH.F.Anamorava, QFAPSH, ZRGJ.
