Apeli e shpall të pafajshëm, Salih Kqiku flet për përballjen me pesë aktakuza
Salih Kqiku, ish-drejtor i Prokurimit dhe i Financave në Komunën e Gjilanit, ka bërë të ditur se Gjykata e Apelit e ka shpallur të pafajshëm, pas përballjes me pesë aktakuza dhe proceseve gjyqësore që, sipas tij, zgjatën me vite.
Në një postim publik, Kqiku ka folur për periudhën e gjatë të pasigurisë dhe presionit gjatë përballjes me akuzat, duke theksuar se ato kanë ndikuar edhe në jetën e tij familjare dhe në dinjitetin personal.
Ai ka vënë në pah rëndësinë e respektimit të parimit të prezumimit të pafajësisë, duke theksuar se ngritja e një aktakuze nuk nënkupton fajësi.
“E vërteta mund të vonojë, por drejtësia duhet të ketë fjalën e fundit”, ka shkruar Kqiku, duke shtuar se vendimet gjyqësore duhet të mbështeten në prova dhe jo në paragjykime apo gjykime publike.
Salih Kqiku ka ushtruar më parë detyrën e drejtorit të Prokurimit dhe të Financave në Komunën e Gjilanit.
