Reagimi i gazetarit Asdren Agushi ndaj Kadriut: Burgu i vjetër i Gjilanit është pjesë e historisë së dhimbshme të shqiptarëve
Gazetari Asdren Agushi ka reaguar ndaj deklarimit të Kushtrim Kadriut, kryetar i Lëvizjes Qytetare “Vatra” dhe anëtar i Kuvendit Komunal të Gjilanit, lidhur me ruajtjen e një pjese të burgut të vjetër në hapësirën ku po ndërtohet objekti i ri komunal.
Kadriu, përmes një statusi në rrjetet sociale, kishte vënë në pikëpyetje vlerën historike të kësaj pjese të burgut, duke shprehur qëndrimin se ruajtja e saj nuk duhet të pengojë zhvillimin dhe harmoninë arkitektonike të objektit të ri të Komunës.
Reagimi i Agushit lidhet me rëndësinë historike të burgut dhe përvojat e shqiptarëve që janë mbajtur e torturuar aty gjatë periudhave të ndryshme. Gazetari ka treguar edhe përvojën personale të familjes së tij, duke bërë të ditur se babai i tij kishte qëndruar në këtë burg.
Agushi ka shkruar se menjëherë pas hyrjes së forcave të NATO-s në Kosovë, kur në burgun e Gjilanit ishin të vendosura forcat amerikane, kishte kërkuar, si gazetar, ta vizitonte objektin dhe të xhironte me kamerë qelitë ku kishte qëndruar babai i tij. Sipas rrëfimit të tij, gjatë asaj vizite kishte parë njolla gjaku në muret e burgut.
Duke kundërshtuar mënyrën se si Kadriu i është referuar objektit, Agushi ka theksuar se rëndësia historike e tij nuk mund të vlerësohet vetëm nga gjendja fizike e mureve apo nga përputhshmëria me arkitekturën moderne.
“Historia nuk matet me bukurinë e mureve, as me harmoninë arkitektonike të një ndërtese moderne. Ajo matet me atë që ka ndodhur brenda atyre mureve, me vuajtjet e njerëzve, me gjakun e derdhur dhe me kujtesën që ua kemi borxh brezave që vijnë”, ka shkruar Agushi.
Në reagimin e tij, gazetari ka shprehur kritika të ashpra ndaj Kadriut, duke e ftuar atë të tërhiqet nga politika dhe jeta publike.
Debati për pjesën e mbetur të burgut të vjetër ka nxitur diskutime mbi mënyrën e trajtimit të objekteve me rëndësi historike në Gjilan, duke vënë përballë qëndrimin për zhvillimin dhe harmoninë arkitektonike të objektit të ri me kërkesën për ruajtjen e kujtesës historike të vendit.
