VITIA MIKPRITËSE E NJËRIT NGA SAMITET MË TË MËDHA NDËRKOMBËTARE TË RINISË NË KOSOVË
Komuna e Vitisë, nën udhëheqjen e Kryetarit z. Sokol Haliti, do të jetë mikpritëse e edicionit të 6-të të samitit ndërkombëtar “The Youth Summit on Peace & Sustainable Future 2026”, një nga ngjarjet më të rëndësishme rinore me karakter ndërkombëtar, që do të mbahet nga 25 deri më 29 gusht 2026 në Viti.
Përzgjedhja e Vitisë si qytet mikpritës i këtij samiti paraqet një arritje të rëndësishme për komunën dhe një vlerësim ndërkombëtar për angazhimin institucional në promovimin e rinisë, dialogut, bashkëpunimit dhe zhvillimit të qëndrueshëm.
Gjatë pesë ditëve të samitit, Vitia do të mirëpresë të rinj, liderë, studiues, diplomatë dhe përfaqësues të organizatave nga vende të ndryshme të botës, të cilët do të diskutojnë për paqen, diplomacinë rinore, politikat publike dhe sfidat globale të së ardhmes.
Ky organizim realizohet në bashkëpunim ndërmjet Komunës së Vitisë, Diplomatic Mission Peace and Prosperity (DMPP) – Misioni Diplomatik për Paqen dhe Prosperitetin dhe partnerëve të tjerë ndërkombëtarë. DMPP është një organizatë me veprimtari ndërkombëtare në fushën e diplomacisë, paqes dhe zhvillimit, e cila bashkon institucione, ekspertë dhe të rinj nga mbarë bota në iniciativa me ndikim global.
Përmes këtij samiti, Vitia do të shndërrohet në një qendër ndërkombëtare të dialogut dhe bashkëpunimit, duke promovuar vlerat e paqes, mirëkuptimit dhe fuqizimit të brezave të rinj. Njëkohësisht, kjo ngjarje e vendos komunën tonë në hartën e organizimeve më të rëndësishme ndërkombëtare të rinisë dhe dëshmon besimin që partnerët globalë kanë në institucionet dhe qytetarët e Vitisë.
Komuna e Vitisë mbetet e përkushtuar në mbështetjen e iniciativave që krijojnë mundësi të reja për të rinjtë dhe forcojnë rolin e tyre në ndërtimin e një të ardhmeje më të sigurt, më paqësore dhe më të qëndrueshme.
