Trajneri i Andorrës gati t’i prish planet Shqipërisë: Do t’i mbajmë sa më larg zonës!
Në prag të ndeshjes ndaj Shqipërisë, trajneri i Andorrës, Koldo Álvarez, ka folur për mediat, duke dhënë vlerësimin e tij për sfidën dhe duke pranuar vështirësinë e përballjes me kuqezinjtë, të cilët janë në garë për kualifikim në Kampionatin Botëror 2026.
“Do të doja që lojtarët e mi të ishin në formën më të mirë të mundshme dhe të zbatonin gjithçka që kemi punuar gjatë kësaj jave, që për humor, zgjati katër orë”, u shpreh me buzëqeshje Álvarez. “Do të përpiqemi ta vëmë në praktikë nesër në fushë. Nëse arrijmë të bëjmë atë që kemi përgatitur, do të jemi afër objektivave tona.”
Trajneri i Andorrës pranoi se sfida do të jetë shumë e vështirë, pasi përballë kanë një kundërshtar që po luan për një objektiv madhor.
“Përballë kemi një rival që po lufton për t’u kualifikuar dhe për të shkuar në një fazë finale të Botërorit. Nëse arrijmë të përballojmë intensitetin e tyre në fillim, gjasat tona do të rriten. Por nëse nuk ia dalim, do të vuajmë si në ndeshjet e mëparshme,” tha ai.
Álvarez nënvizoi se çelësi i lojës për Andorrën do të jetë qëndrueshmëria mbrojtëse: “Duhet të mbrohemi mirë dhe t’i mbajmë kundërshtarët sa më larg zonës sonë. Nëse i ndalim katër apo pesë metra jashtë zonës, është shumë më mirë për ne. Por nëse u lejojmë hapësira brenda, atëherë bëhet shumë e vështirë t’i përballosh,” shtoi Alvarez.
