Takime të ngjeshura në aktivitetet ditore të Alban Hysenit, kandidat i LVV-së për kryetar të Gjilanit
Kandidati I LVV-së për kryetar të Gjilanit ka vazhduar me intensitetin e vizitave, takimeve e aktiviteteve tjera në lokalitete të ndryshme dhe biznese lokale, në kuadër të fushatës së tij gjatë periudhës së balotazhit.
Ai ka vizituar qendrën e thirrjeve “Avedo’, ku ka qëndruar bashkë me deputeten Arijeta Rexhepi dhe nënkryetarin e Lëvizjes Vetëvendosje në Gjilan, Luan Aliu.
*** POSTIMI I PLOTË I ALBAN HYSENIT
“Bashkë me deputeten Arijeta Rexhepi dhe nënkryetarin e Lëvizjes, Luan Aliu, vizituam qendrën “Avedo”, një ndër qendrat më moderne të thirrjeve në Gjilan”.
“Drejtuesit e kësaj qendre na treguan për mënyrën se si po zgjerojnë aktivitetin e tyre, duke krijuar mundësi të reja pune për shumë të rinj të Gjilanit, të cilët po tregojnë aftësi dhe profesionalizëm”.
“Shembuj të tillë janë dëshmi fantastike se Gjilani ynë ka potencial, energji dhe rini innovative”.
Hyseni, poashtu ka njoftuar se gjatë vizitave në terren, ka qëndruar edhe te kompania SPHINX L.L.C, duke e konsideruar një histori suksesi që e ka shtrirë ndikimin e saj në gjithë rajonin e Ballkanit Perëndimor.
“Kjo kompani, që përfaqëson markën ndërkombëtare HSG Laser, është bërë emër i njohur për shitjen, instalimin dhe mirëmbajtjen e makinerive CNC Fiber Laser, si dhe për trajnimin profesional të operatorëve. Me qindra klientë në tërë Kosovën, ky është shembull i inovacionit dhe i përkushtimit të bizneseve që po e vendosin Gjilanin tonë në hartën e zhvillimit teknologjik”, ka shkruar Hyseni.
