Shqiptari Hismet Smakaj shpallet hero në Londër – shpëtoi 7-vjecaren që po mbytej në lumë
Hismet Smakaj, 65-vjeçari nga Shkodra që shpëtoi jetën e një vajze 7-vjeçare që po mbytej në lumin Tamiz, Londër, është shpallur Heroi i muajit Maj.
Pasditen e 17 Majit, Hismeti ishte me bashkëshorten e tij duke u kthyer nga një shërtitje, kur vuri re vajzën e cila po qëndronte në kangjëllat metalike pranë lumit. Teksa po kalonin pranë saj, vajza shkëputi duart dhe u hodh në ujin e ftohtë dhe të vrullshëm të lumit.
Pa u menduar dy herë, Hismeti hoqi rrobat, bëri 3-4 hapa mbrapa, dhe u hodh në lumë për të shpëtuar jetën e vajzës. Pasi notoi për rreth 5 metër, ai arriti ta kapë vajzën që po e merrte rrjedha duke u kapur fort pas murit të bregut të lumit.
Brenda pak minutash në zonë u mblodh një turmë e madhe njerëzish, bashkë me policinë, të cilët ndihmuan në misionin e shpëtimit të vajzës.
Me këtë gjest, Hismeti u bë heroi i ditës në Londër dhe i shqiptarëve kudo ku ndodhen.
