“Puhi drite” nga Tirana ndriçon Zhegrën: Klejda Plangarica shpallet fituese e “Muza e Agimit” 2026
Zhegër, Gjilan – Poetja nga Tirana, Klejda Plangarica, është shpallur fituese e Çmimit Letrar “Muza e Agimit” 2026, në kuadër të Manifestimit tradicional kulturor “Ditët e Agimit”.
Pjesa letrare “Muza e Agimit” u mbajt në ambientet e Shkollës së Mesme të Ulët “Agim Ramadani” në Zhegër të Gjilanit, në prani të shumë krijuesve letrarë dhe artdashësve.
Manifestimi u hap në mënyrë simbolike me zërin e heroit të kombit, Agim Ramadani, i cili, nga pozicionet e Koshares, dëgjohej duke bashkëbiseduar me bashkëshorten: “Ne po fitojmë”.
Të pranishmëve iu drejtua me një fjalë përshëndetëse vëllai i heroit, Jashar Ramadani, ndërsa poetja Linditë Ramushi-Dushku deklamoi një poezi kushtuar heroit, të shkruar nga autori Ibrahim Kadriu.
Leximi i poezive konkuruese u realizua sipas rendit alfabetik dhe u moderua nga poetja Kaltrinë Berisha. Nëntëmbëdhjetë poetë nga Kosova, Maqedonia e Veriut, Shqipëria dhe Kosova Lindore paraqitën krijimet e tyre premierë.
Juria letrare, e përbërë nga Zyrafete Shala – kryetare, Nexhat Rexha dhe Mehmetali Rexhepi – anëtarë, i përcolli me kujdes të gjitha leximet.
Çmimin e parë e fitoi poetja Klejda Plangarica nga Tirana, me poezinë “Puhi drite”. Vendi i dytë i takoi poetit nga Malisheva, Mehdi Krasniqi, me poezinë “Shpërfillje”, ndërsa vendin e tretë e zuri poetja nga Gjilani, Albina Idrizi, me poezinë “Ka ditë si kjo ditë”.
Aktiviteti u organizua nga Shoqata “Ditët e Agimit” dhe Ars Clubi “Beqir Musliu”.
