Presidenti i SHBA-së, Joe Biden uron Kosovën me rastin e 14-vjetorit të pavarësisë.!
Bideni në urimin e tij ka thënë se Kosova ka bërë përparim të jashtëzakonshëm që nga shpallja e pavarësisë, ndërsa ka thënë se Kosova nga një demokraci e brishtë është shndërruar në një shtet të gatshëm për të ndarë përvojat e veta me botën, transmeton https://mediakos.org/.
“Kosova ka bërë përparim të jashtëzakonshëm gjatë 14 viteve të pavarësisë së saj, duke u shndërruar nga një demokraci e brishtë në një shtet të gatshëm për të ndarë përvojat e veta me botën siç e demonstruat ju gjatë Samitit për Demokraci në dhjetor. E përshëndes përkushtimin tuaj për punën e vazhdueshme dhe jetike për forcimin e institucioneve të Kosovës dhe për t’u siguruar që demokracia e Kosovës sjellë rezultate për të gjithë qytetarët e vendit tuaj. Shtetet e Bashkuara do të mbeten partner i palëkundur i Kosovës përderisa ju përpiqeni ta luftoni korrupsionin dhe ta forconi sundimin e ligjit, të mbroni të drejtat e pakicave fetare dhe etnike, të nxisni një rritje ekonomi të drejtë dhe transparente dhe të siguroni një të ardhme të qëndrueshme energjitike”, thuhet në urimin që Biden ia ka dërguar presidentes së Kosovës, Vjosa Osmani.
Në urimin e tij, Bideni ka thënë se SHBA-ja do të mbështes Kosovën për të arritur një marrëveshje me Serbinë të përqendruar në njohje reciproke.
Presidentja ne profilin e saj ka shkruar :
Jam e lumtur ta ndaj me ju urimin e Presidentit Biden për ditën e pavarësisë së Kosovës – 17 shkurtin, në të cilin ai potencon se Shtetet e Bashkuara mbesin partner i palëkundur i Kosovës.Presidenti Biden në këtë urim, duartroket punën dhe përkushtimin tonë për forcimin e demokracisë dhe në luftën kundër krimit e korrupsionit, teksa kërkon që dialogu të përqendrohet në njohje reciproke. Sipas tij, në Samitin për Demokraci, Kosova ka dëshmuar se është e gatshme ta ndajë përvojën me shtete të tjera, ndaj thekson se gjatë këtij viti Kosova vazhdimisht ka treguar lidership në arenën ndërkombëtare. Në urimin e tij, Presidenti Biden ka përsëritur faktin e lidhjes së veçantë, të cilën familja Biden e ka me vendin tonë.Kosova është e bekuar ta ketë në krah aleatin e saj të përhershëm, Shtetet e Bashkuara të Amerikës!Zoti e bekoftë miqësinë e Kosovës me ShBA-të!
