Pasuria e deklaruar e Abdixhikut – shtëpi e banesa në vlerë mbi 800 mijë euro

Kryetari i LDK-së, Lumir Abdixhiku, ka deklaruar gjithsej pesë pasuri të paluajtshme, sipas të dhënave të publikuara në formularin e deklarimit të pasurisë në Agjencinë për Parandalimin e Korrupsionit.

Sipas deklarimit, dy prej pasurive të paluajtshme janë të trashëguara nga prindërit, ndërsa tri të tjera janë blerë përmes kredive bankare dhe kursimeve familjare.

Një banesë me sipërfaqe 118.20 metra katrorë, e vlerësuar në 120 mijë euro, është trashëguar në vitin 2025 dhe figuron në pronësi të bashkëshortes. Po ashtu, një tjetër banesë prej 94.15 metra katrorë, me vlerë 100 mijë euro, është gjithashtu e trashëguar në vitin 2025 dhe është në pronësi të bashkëshortes.

Ndërkohë, një shtëpi me sipërfaqe 200 metra katrorë, e vlerësuar në 150 mijë euro, rezulton e trashëguar nga prindërit që nga viti 1989 dhe është në pronësi të deklaruesit.

Sa i përket pasurive të blera, Abdixhiku ka deklaruar një shtëpi prej 214 metrash katrorë, të blerë në vitin 2014 përmes një kredie bankare dhe kursimeve, me vlerë 200 mijë euro.

Po ashtu, një banesë prej 174 metra katrorë, e blerë në vitin 2023 përmes kredie bankare, është deklaruar me vlerë 265 mijë euro. Të dyja këto pasuri janë në pronësi të përbashkët.

Në total, vlera e pasurive të paluajtshme të deklaruara arrin në rreth 835 mijë euro.

Kryetari i LDK-së, Lumir Abdixhiku, në deklarimin e pasurisë ka raportuar edhe pasuritë e luajtshme me vlerë mbi 3 mijë euro.

Sipas të dhënave, në këtë kategori është deklaruar një veturë e tipit Mercedes-Benz, e blerë në vitin 2019 përmes kredie bankare.

Vlera e saj është deklaruar 25 mijë euro, ndërsa figuron në pronësi të bashkëshortes.

Në deklarimin e pasurisë ka raportuar edhe zotërimin e aksioneve në një shoqëri tregtare.

Sipas të dhënave, bëhet fjalë për kompaninë AMPERA GROUP, ku janë deklaruar 25 % e aksioneve.

Aksionet janë regjistruar dhe përfituar më 15 prill 2024, ndërsa vlera e tyre është deklaruar 0 euro. Këto aksione figurojnë në pronësi të bashkëshortes.

Abdixhiku, ka deklaruar edhe mjetet e tij financiare në formë të parave të gatshme dhe kursimeve.

Sipas të dhënave, në total, kursimet familjare të deklaruara arrijnë në rreth 9,594 euro.

Në vitin 2025, Kryetari i Lidhjes Demokratike të Kosovës (LDK) Lumir Abdixhiku ka paraqitur katër prona të paluajtshme.

Këtu mund ta shihni deklarimin e pasurisë së kryetarit të LDK-së, Lumir Abdixhiku.