Dramë me pesë gola në Gjilan, Dukagjini triumfon në sekondat e fundit
Një ndeshje spektakolare është zhvilluar në Gjilan, ku Dukagjini ka marrë një fitore dramatike 3:2 ndaj vendasve, në kuadër të xhiros së 29-të në Superligë.
Skuadra nga Klina e nisi më mirë takimin, duke kaluar në epërsi në minutën e 23-të me Altin Merlakun, i cili shënoi pas një penalltie të kthyer nga portieri.
Gjilani reagoi në pjesën e dytë, ku Robert Rrahmani barazoi shifrat në 1:1 në minutën e 51-të. Megjithatë, epërsia mysafire u rikthye shpejt, pasi Dienit Isufi realizoi për 2:1 vetëm pak minuta më vonë.
Kur gjithçka dukej se po mbyllej me këtë rezultat, dramat u zhvendosën në kohën shtesë. Udoyen Akpan shënoi për 2:2 në minutën e 92-të, duke rikthyer shpresat për vendasit.
Por Dukagjini kishte fjalën e fundit – në minutën e 95-të, Dardan Morina realizoi golin e fitores për 3:2, duke vulosur një triumf të madh për skuadrën e tij.
Me këtë fitore, Dukagjini ngjitet në kuotën e 38 pikëve në vendin e gjashtë, ndërsa Gjilani mbetet i pesti me 43 pikë.
