Prapaskenat e ndeshjes Rumani – Kosovë: Tensione, hedhja e gjësendeve dhe largimi nga fusha i lojtarëve të Kosovës

Kosova ka luajtur baras me rezultat 0-0 ndaj Rumanisë në udhëtim në kuadër të xhiros së parafundit të këtij edicioni të Ligës së Kombeve.

Përkundër dominimit total dhe rasteve të shumta të shënimit, ‘Dardanët’ nuk ia dolën që të marrin pikët e plota.

Ndeshja u ndërpre në minutat shtesë pasi lojtarët e Kosovës refuzuan të kthehen në fushë shkaku i thirrjeve raciste dhe fyerjeve të ndryshme.

Dy gazetarët e Telegrafit, Romak Zeqiri dhe Arbios Kryeziu ishin në stadium dhe nga aty ne iu sjellim disa nga prapaskenat që mundur t’u kenë ikur nga ndeshja me Rumaninë.

Ndryshimi i vendit nga ultrasit rumunë

Ultrasit rumunë kanë ndryshuar vendin për ketë takim duke u vendosur në pjesën e epërme të stadiumit dhe jo si zakonisht ku ishin posht prapa portës.

Vërshëllehet himni i Kosovës dhe vërehet prezencë e flamurit të Serbisë në shkallët e stadiumit

Me të filluar intonimi i himnit të Kosovës, tifozët vendas filluan me fishkëllima të mëdha teksa në stadium pati prezencë edhe të flamurit serb.

Muric u vërshëllye nga tifozët vendas në çdo prekje të topit

Portieri Aro Muric vazhdimisht u vërshëllye nga tifozët sa herë pati kontakt me topin, pasi në ndeshjen e kaluar kishte ofenduar ata.

Gjësende të hedhura në drejtim të Zhegrovës

Tifozët rumunë hodhën gjësende në drejtim të Edon Zhegrovës gjatë ekzekutimit të rivënies këndore, të cilat ai i largoi me forcë dhe mori vërshëllime të shumta.

Tifozët rumunë filluan thirrjet provokative ‘Serbia, Serbia’ dhe “Kosova është Serbi” dhe lojtarët e Kosovës lëshuan fushën.

Po luheshin minutat e fundit të sfidës kur tifozët rumunë filluan thirrjet provokative ‘Serbia, Serbia’ të cilat shkaktuan reagim të menjëhershëm nga lojtarët e Kosovës dhe ndërprerje të menjëhershme të ndeshjes.

Minuta 92’ – tifozët vendas hodhën karrige në fushë, Elvis Rexhbecaj ua tregoi logon e Kosovës

Pasi situata arriti kulmin e tensionimit, tifozët vendas filluan hedhjen e gjësendeve në fushë teksa mesfushori Rexhbeçaj iu kundërpërgjigj atyre duke iu treguar logon e Kosovës.

Rritje e numrit të forcave policore pranë tribunës ku janë të vendosur tifozët rumunë

Me t’u larguar lojtarët e Kosovës nga fusha, u vërejt një rritje e numrit të forcave policore për të parandaluar ndonjë përshkallëzim të mundshëm të situatës. Burimi i lajmit: /Telegrafi/