Përkujtohen dëshmorët Abdullah Tahiri, Ibrahim Pacolli dhe Arben Ramadani
Në përvjetorin e rënjes së dëshmorëve të kombit: Abdullah Tahiri, Ibrahim Pacolli, dhe Arben Ramadani, janë bërë homazhe te varrezat e dëshmorëve në Gjilan dhe te shtatorja e Abdullah Tahirit.
Për homazhe ishin zyrtarë konunal, familjarë të dëshmorëve të kombit, invalidë dhe veteranë të UÇK-së, përfaqësues politik dhe qytetarë.
Nënkryetarja e Komunës së Gjilanit, Leonora Morina Bunjaku, në emër të kryetarit Alban Hyseni, tha se janë mbledhur me përulësi dhe nderim të thellë, për të kujtuar dhe nderuar veprën madhore të bijve më të mirë të kombit tonë – Abdullah Tahiri, Ibrahim Pacolli dhe Arben Ramadani, të cilët ranë për lirinë dhe dinjitetin e popullit tonë, më 19 maj të vitit 1999.
“Këta burra, me guxim dhe vendosmëri të pashoqe, i dolën zot atdheut në kohët më të vështira të historisë sonë të re. Nuk kursyen asgjë – as jetën e tyre – që Kosova të jetojë e lirë dhe sovrane. Ata ishin flamurtarë të lirisë, shembull i përkushtimit dhe dashurisë ndaj vendit”, tha Morina Bunjaku.
Nënkryetarja e Gjilanit, theksoi se rënia e tyre është plagë që dhemb, por edhe pishtar që ndriçon rrugën tonë. Ata nuk janë thjesht pjesë e së kaluarës, por janë pjesë e përditshmërisë sonë dhe të ardhmes që ndërtojmë mbi themelet e sakrificës së tyre.
“Ne, si institucione dhe si shoqëri, kemi për obligim që amanetin e tyre ta çojmë përpara me punë të ndershme, me drejtësi, me zhvillim dhe me respekt të përhershëm për gjakun e derdhur për liri”, tha nënkryetarja e komunës.
