Pensionohet Ruhan Zymberi, drejtor i SHFMU “Sadullah Brestovci” në Gjilan
Pas një karriere të gjatë në arsimin gjilanas, është pensionuar Ruhan Zymberi, drejtor i Shkollës Fillore të Mesme të Ultë “Sadullah Brestovci”.
Lajmin e ka bërë të ditur vetë ai përmes një postimi në rrjetin social Facebook, ku ka falënderuar kolegët dhe bashkëpunëtorët përkrahjen gjatë viteve të punës së përbashkët.
Në mesazhin e tij, Zymberi ka thënë se pensionimi e gjen me emocione të veçanta, por me zemër plot mirënjohje për të gjitha momentet e kaluara me kolektivin.
“Ishte nder dhe privilegj për mua të jem pjesë e këtij kolektivi, ku ndamë sfida, suksese, përvoja dhe kujtime të paharrueshme”, ka shkruar ai.
Drejtori i pensionuar ka vlerësuar atmosferën e korrektësisë, respektit dhe mirëkuptimit që, sipas tij, e ka bërë më të lehtë ushtrimin e profesionit.
Ai ka theksuar se nga secili koleg ka marrë motivim për ta kryer me përkushtim detyrën e drejtorit.
Në fund të mesazhit, Zymberi ka uruar shëndet, suksese dhe mbarësi për të gjithë bashkëpunëtorët, duke shprehur dëshirën që shkolla të vazhdojë rrugën me rezultate të mira dhe me frymën e bashkëpunimit e respektit që e ka karakterizuar gjithmonë.
