Pas 45 vitesh në shërbim të pacientëve, pensionohet infermierja gjilanase Adile Zylfiu Jakupi

Infermierja Adile Zylfiu Jakupi ka përmbyllur karrierën e saj profesionale pas 45 vitesh punë, përkushtim dhe shërbim ndaj pacientëve, duke lënë pas një kontribut të çmuar në kujdesin shëndetësor në Gjilan dhe rrethinë.

E lindur në fshatin Kopërnicë, ajo ia kushtoi jetën profesionit të infermierisë, duke shërbyer në Pogragjë, në Qendrën Kryesore të Mjekësisë Familjare “Dr. Nagip Rexhepi” në Gjilan, si dhe në Qendrën e Mjekësisë Familjare në lagjen Dardania.

Gjatë 45 viteve të punës, Adile Zylfiu Jakupi u dallua për profesionalizmin, humanizmin dhe kujdesin ndaj pacientëve, duke dëshmuar përkushtim të vazhdueshëm ndaj profesionit dhe shëndetit publik.

Përtej angazhimit profesional, ajo është edhe bashkëshorte dhe nënë e përkushtuar e katër fëmijëve.

Me rastin e pensionimit, familjari i saj, Rashit Zylfiu, i ka përcjellë urimet për këtë etapë të re të jetës, duke vlerësuar përkushtimin, punën dhe vlerat e saj njerëzore.

Pas dekadash në shërbim të shëndetit dhe mirëqenies së pacientëve, pensionimi shënon fundin e një rrugëtimi të gjatë profesional dhe fillimin e një kapitulli të ri pranë familjes dhe njerëzve të dashur.

Urime pensionimi, Adile Zylfiu Jakupi! Shëndet, jetë të gjatë dhe shumë momente të lumtura pranë familjes!