Në “Vjeshtën letrare”, shpaloset dhe vlerësohet portreti letrar i shkrimtarit Jusuf Buxhovi
Nuk kanë të ndalur aktivitetet e edicionit të 16 të manifestimit tradicional kulturor, i njohur tashmë si “Vjeshta letrare e Gjilanit”.
Në veprimtarinë e tretë, u shpalos dhe vlerësua portreti letrar i shkrimtarit Jusuf Buxhovi, njëri nga shkrimtarët e shquar të Kosovë dhe fitues i vjetëm i Çmimit letrar, “Beqir Musliu”, si çmimi më prestigjioz letrar që e jep Komuna e Gjilanit, për vlera të mirëfillta letrare, për shkrimtarët që kanë rrumbullakësuar një karrierë të begatshme me prurje të reja dhe vlera artistike për letërsinë.
Për krijimtarinë e bujshme të tregimtarit, romansierit, historianit e publicistit Jusuf Buxhovi, në Bibliotekën e qytetit “Fan S. Noli” folën, shkrimtari Ibrahim Kadriu, poetja Kaltrinë Berisha, magjistri i letërsisë, Arsim Halili, , profesoreshë dhe krijuesja e re Blinerë Hajdari, poeti e kritiku letrar, Nexhat Rexha dhe poeti e kritiku letrar, Shefqet Dibrani.
Me deklamime, fragmente nga krijimtaria në prozë e Jusuf Buxhovit lexuan Linditë Ramushi Dushku dhe Arbisë Krasniqi.
Para krijuesve dhe artdashësve foli edhe vetë shkrimtari Jusuf Buxhovi, i cili tha se ndihet dyfish i nderuar. Sipas tij e para, si laureat i çmimit letrar “Beqir Musliu” dhe së dyti që është këtu në mes krijuesve.
Këtë veprimtari letrare, e udhëhoqi shkrimtari Sabit Rrustemi, drejtues i Ars Clubit “Beqir Musliu”, i cili tha se ky është edicionit të 16 të manifestimit tradicional kulturor, “Vjeshta letrare e Gjilanit”.
Sipas tij kjo ka vetëm një mision afirmimin e vlerave letrare, librave të mirë, shkrimtarëve që i kanë dhënë, po i japin dhe do t’i japin letërsisë shqipe, pavarësisht nga vijnë, ku jetojnë dhe veprojnë.
Derisa krijueseve dhe artdashësve në këtë veprimtari i’u shpërnda edhe numrin i 47 i revistës letrare “Agmia”, numër që i përkushtohet siç është bërë tashmë traditë, fituesit të përvitshëm të këtij çmimi, botimin të cilin e ka ndihmuar MKRS-ja përmes Departamentit të kulturës, përmes një thirrjeje publike për vitin 2025.
