Në UKZ u promovua libri “Epoka e konsujve dhe paradigma të tjera” i autorit Bajram Kosumi
Në organizim të Fakultetin e Edukimit të Universitetit Publik “Kadri Zeka” u mbajt promovimi i librit “Epoka e konsujve dhe paradigma të tjera” të autorit, publicistit, studiuesit, ish-kryeministrit të Kosovës dhe ish rektorit të UKZ-së Bajram Kosumi.
Kjo veprimtari kulturore dhe akademike mblodhi profesorë, studiues, studentë dhe dashamirë të librit, të cilët patën mundësinë të bashkëbisedojnë me autorin rreth krijimtarisë së tij dhe ideve që trajton vepra.
Paraprakisht, autori Bajram Kosumi u prit në takim nga Rektori i Universitetit, Prof. Asoc. Dr. Artan Dërmaku, ku u diskutua për rëndësinë e bashkëpunimit akademik, si dhe rolin e veprave shkencore e letrare në pasurimin e mendimit intelektual shqiptar.
Në fjalën hyrëse të promovimit, Rektori Prof. Asoc. Dr. Artan Dërmaku vlerësoi lart kontributin e autorit në jetën akademike, letrare dhe publike shqiptare, duke theksuar se libri “Epoka e konsujve dhe paradigma të tjera” paraqet një vepër me vlera të veçanta studimore e letrare. Ai e uroi Prof. Dr. Bajram Kosumin për këtë botim, duke shtuar se puna dhe përkushtimi i tij mbeten model frymëzimi për brezat e rinj.
Me fjalë rasti u drejtua edhe u.d. Dekanja e Fakultetit të Edukimit, Prof. Asoc. Dr. Nerxhivane Krasniqi, e cila potencoi rëndësinë e kësaj vepre në trajtimin e çështjeve të identitetit dhe kulturës shqiptare në kontekstin ballkanik, si dhe kontributin e autorit në fushën e studimeve letrare dhe publicistike.
Ndërkaq, Prof. Emeritus Merxhan Avdyli, në cilësinë e recensentit dhe bashkëbiseduesit të aktivitetit, paraqiti vlerësimet për librin, duke e cilësuar atë si një studim me qasje origjinale dhe reflektuese, i cili sjell interpretime të reja mbi identitetin shqiptar dhe ballkanik përmes asaj që autori e quan “literatura konsullore” – tekstet e konsujve, gazetarëve dhe udhëpërshkruesve evropianë nga mesi i shekullit XIX e deri në ditët e sotme.
Gjatë bashkëbisedimit me pjesëmarrësit, autori Prof. Dr. Bajram Kosumi prezantoi idetë kryesore të veprës, duke ndarë reflektime mbi proceset historike, kulturore dhe identitare që kanë ndikuar në formësimin e perceptimeve për shqiptarët dhe Ballkanin. Kurse të pranishmit, kanë theksuar origjinalitetin e veprës si në aspektin zhanror, tematik ashtu edhe në ligjërimin autentik të autorit.
Ata gjatë bashkëbisedimit me autorin vlerësuan se Libri “Epoka e konsujve dhe paradigma të tjera” paraqet një kombinim idesh, kulturash, stilesh apo elementesh të ndryshme letrare dhe studimore, duke trajtuar kompleksitetin e identitetit shqiptar dhe ballkanik përmes analizave të dokumenteve, narrativave dhe paradigmave të ndryshme historike e kulturore.
Postromani i ri i Bajram Kosumit trajton identitetin shqiptar dhe ballkanas në raport me “Literaturën Konsullore”, siç quhet letërsia dokumentare e udhëpërshkruesve, filologëve, gazetarëve dhe konsujve të shumtë perëndimorë në qytetet shqiptare dhe ballkanike.
Në vepër ndërtohet një analogji e qartë ndërmjet epokës së konsujve dhe epokës së inteligjencës artificiale, ku shumësia e informacionit ndikon dhe shpesh paragjykon të vërtetën.
Ngjarjet në libër shtrihen nga mesi i shekullit XIX deri në vitin 2025, duke përfshirë personazhe historike e imagjinare, si dhe ngjarje historike të letrarizuara dhe të interpretuara nga perspektiva e Literaturës Konsullore.
