Lutfi Haziri ngushëllon familjen Gagica për ndarjen nga jeta të veprimtarit Hafiz Gagica
Kryetari i LDK-së në Gjilan vlerëson lart kontributin e Hafiz Gagicës për lirinë, pavarësinë dhe afirmimin e Kosovës në botë
Kryetari i degës së Lidhja Demokratike e Kosovës në Gjilan, Lutfi Haziri, i ka dërguar telegram ngushëllimi familjes Gagica, me rastin e ndarjes nga jeta të veprimtarit të njohur të çështjes kombëtare, Hafiz Gagica.
Në mesazhin e tij, Haziri ka shprehur pikëllimin e thellë për humbjen e një prej figurave të rëndësishme të angazhimit kombëtar dhe politik në periudhat më të vështira për Kosovën.
Ai ka theksuar se Hafiz Gagica ishte mik dhe bashkëveprimtar i hershëm në përpjekjet për liri, pavarësi dhe demokraci, duke e cilësuar si shembull të përkushtimit ndaj atdheut.
“Shqiptarët mbeten pa një kontributdhënës të madh, Kosova humbi një burrështetas, ndërkaq Gjilani e Anamorava një Qytetar Nderi, patriot e vëlla”, thuhet ndër të tjera në telegramin e Hazirit.
Sipas tij, roli i Hafiz Gagicës ishte i jashtëzakonshëm edhe në organizimin e LDK-së në mërgatë, duke ndihmuar në hapjen e dyerve të Kosovës në Evropë dhe Shtetet e Bashkuara të Amerikës.
Në fund, Haziri u ka shprehur ngushëllime familjes, miqve dhe bashkëveprimtarëve të të ndjerit, duke e falënderuar për kontributin e dhënë në shërbim të atdheut.
