LDK: Nuk ka asnjë marrëveshje me PDK-në në Prishtinë
Lidhja Demokratike e Kosovës (LDK) ka hedhur poshtë zërat për një marrëveshje të mundshme me Partinë Demokratike të Kosovës (PDK) në Prishtinë. Përmes një komunikate për media, kjo parti ka bërë të ditur se nuk ka asnjë marrëveshje për bashkëqeverisje me asnjë subjekt politik në kryeqytet.
Sipas reagimit, LDK thekson se nuk ka marrë pjesë në asnjë proces ndërpartiak që lidhet me ndonjë marrëveshje të tillë. Po ashtu, bëhet e ditur se strukturat partiake dhe organet vendimmarrëse, si në nivel lokal ashtu edhe më gjerë, nuk kanë qenë pjesë e asnjë dakordimi për bashkëqeverisje.
LDK shton se çdo pretendim për marrëveshje nuk përfaqëson qëndrimin zyrtar të partisë dhe nuk krijon obligime politike për të. Në fund, theksohet se për çështjet lokale do të angazhohen pas zgjedhjeve nacionale, ndërsa aktualisht fokusi mbetet në procesin e ringritjes së partisë.
