Lajm historik për Luginën: Bujanoci fiton endokrinologun e parë – Dr. Veton Salihi i jep fund “ekzodit” të pacientëve drejt Vranjës
Bujanoci më në fund merr frymë lirisht në shëndetësi. Dr. Veton Salihi nga Tërnoci ka përfunduar specializimin për endokrinologji në QKUK, duke u bërë mjeku i vetëm i kësaj fushe në të gjithë komunën.
Për vite me radhë, pacientët e Luginës janë detyruar të udhëtojnë në Vranjë për trajtim, për shkak të mungesës së ekspertëve shqiptarë në Bujanoc e Preshevë. Nga sot, ky kapitull mbyllet.
Dr. Salihi kreu specializimin në Klinikën e Endokrinologjisë në Prishtinë, nën mentorimin e dr. Bardhyl Gashit. Në komisionin vlerësues ishin emra të shquar: Prof. Asoc. dr. Elton J. Bahtiri, Ass. dr. sci. Merita Emini-Sadiku dhe Ass. dr. sci. Rina Tafarshiku.
“Ky është një rrugëtim sa sfidues, aq edhe fisnik”, shkroi Dr. Salihi pas përfundimit të specializimit, duke falënderuar mentorët “për durimin, mbështetjen e pakursyer dhe etikën e lartë profesionale”.
I diplomuar për mjekësi në Tiranë, Dr. Salihi prej gati 7 vitesh shërben në Shtëpinë e Shëndetit në Bujanoc. Tani, si endokrinologu i vetëm, ai bëhet shpresë për qindra pacientë që deri dje nuk kishin ku të trokisnin në gjuhën e tyre.
Ky nuk është vetëm sukses personal. Është fitore për shëndetësinë e Luginës dhe një hap jetik për ndaljen e largimit të pacientëve drejt spitaleve serbe.
