Fillon asfaltimi i rrugës Breznicë–Muhoc, projekt që lidh malësinë e Bujanocit me Kamenicën e Gjilanin
Ka nisur asfaltimi i rrugës që lidh fshatrat Breznicë dhe Muhoc në komunën e Bujanocit, një aks i rëndësishëm rrugor që pritet të përmirësojë ndjeshëm qarkullimin e banorëve të kësaj ane.
Ky projekt, me gjatësi rreth 7 kilometra, krijon një lidhje më të lehtë të malësisë së Bujanocit me fshatrat tjera, me qytetin e Bujanocit përmes Tërnocit, por edhe me Kamenicën dhe Gjilanin përmes Breznicës, duke hapur mundësi më të mira për lëvizje, zhvillim ekonomik dhe komunikim mes këtyre trevave.
Për realizimin e këtij projekti kanë kontribuar përmes angazhimit të tyre aktivistë dhe përfaqësues të këtyre lokaliteteve, ndër ta Nazmi Duraku nga Breznica, këshilltar komunal, si dhe Basri Fejzullahu, sikurse edhe aktiviste tjere, të cilët kanë insistuar vazhdimisht për realizimin e kësaj rruge.
Një rol të rëndësishëm në shtyrjen përpara të këtij projekti ka pasur edhe kryetari i Komunës së Bujanocit, Arber Pajaziti, i cili gjatë fushatës zgjedhore kishte premtuar për ndërtimin e këtij aksi rrugor.
Gjatë vizitës në vendpunishte me rastin e fillimit të asfaltimit, kryetari Pajaziti ka bërë të ditur se punimet kanë nisur dhe se projekti po ecën sipas planit.
“Sot ka filluar asfaltimi i shtresës së parë në rrugën Breznicë–Muhoc, një projekt i shumëpritur që po merr formë. Punimet po zhvillohen me ritëm të mirë dhe shumë shpejt kjo rrugë do t’u dorëzohet qytetarëve, duke lehtësuar lëvizjen dhe përmirësuar jetën e përditshme të banorëve”, ka shkruar Pajaziti.
Banorët e kësaj zone e kanë mirëpritur këtë investim, duke e cilësuar si një ndër projektet më të rëndësishme infrastrukturore për këtë pjesë të Malësisë së Bujanocit, pas shumë vitesh pritjeje.
