Spiropali reagon ashpër ndaj deklaratës së ministres serbe: “Ky nuk është mendim politik, është barbarizëm verbal”
Ministrja për Evropën dhe Punët e Jashtme e Shqipërisë, Elisa Spiropali, ka reaguar pas deklaratës së ministres serbe që shprehu keqardhje se ish-presidenti jugosllav, Slobodan Millosheviq, nuk kishte dëbuar shqiptarët e Kosovës në vitin 1998.
Spiropali e ka cilësuar deklaratën si të papranueshme dhe në kundërshtim me vlerat evropiane, duke thënë se një gjuhë e tillë nuk mund të vijë nga një përfaqësuese e një shteti që synon integrimin në Bashkimin Evropian.
“E pabesueshme të dëgjosh nga një ministre e një qeverie të një vendi që aspiron integrimin europian të shprehë pa asnjë drojë keqardhjen se në Kosovë nuk u vranë mjaftueshëm fëmijë, gra, burra e të moshuar”, ka shkruar Spiropali.
Ajo e ka cilësuar këtë qëndrim si “barbarizëm verbal” dhe jo si një qëndrim politik, duke kërkuar që deklarata të tilla të mbajnë përgjegjësi politike dhe institucionale.
“Kush justifikon ose shpreh keqardhje për krime që nuk u kryen në përmasa edhe më të mëdha, nuk mund të jetë partner i vlerave europiane”, ka deklaruar Spiropali.
Ministrja shqiptare ka theksuar se liria e Kosovës është fituar me sakrificë dhe gjak, duke kërkuar nga Evropa të mbrojë kujtesën e viktimave të luftës.
“Nëse Serbia rrugën drejt Bashkimit Evropian e ka seriozisht, nuk mund të qëndrojë indiferente ndaj këtij makabriteti verbal, i cili dëmton më së shumti bashkëjetesën paqësore me fqinjët”, ka përfunduar Spiropali.
