Lajm i hidhur: Shuhet legjenda e gazetarisë sportive, Sami Ademi
Sporti shqiptar është në zi. Është ndarë nga jeta në kohën më të mirë gazetari dhe komentatori i njohur, Sami Ademi.
Legjenda e mikrofonit ndërroi jetë pasditën e sotme, pas një sëmundjeje të rëndë që e mbajti larg ekranit vetëm në javët e fundit.
Për dekada, Samiu i dha zë emocioneve tona. Zëri i tij karakteristik dëgjohej deri para dy javësh në MRT 2, ku komentonte me profesionalizëm të rrallë futbollin dhe sportet e tjera. Ishte ndër emrat më të respektuar të gazetarisë sportive shqiptare.
Por Sami Ademi ishte më shumë se komentator. Ishte mik, mësues dhe mbështetje e palëkundur për brezat e rinj të gazetarëve. Me këshilla, përvojë dhe zemër të madhe, ai rriti dhjetëra zëra të rinj në këtë profesion.
E donte shumë Kosovën dhe çdo sukses i saj e gëzonte si të ishte i tij. Ikja e tij e parakohshme lë një boshllëk të madh në gazetarinë shqiptare, jo vetëm në Maqedoninë e Veriut.
Samiu la gjurmë të pashlyeshme. Do të kujtohet përherë për profesionalizmin, zërin që na bashkonte dhe virtytet që e bënë të veçantë.
Lamtumirë, mjeshtër.
